भांगरभूंय | प्रतिनिधी
भांगरभूंय । प्रतिनिधी
म्हापशेंः हळदोणे पंचायत मंडळाक विस्वासांत घेनास्तना सरकारान जेटी धोरणाचो मसुदो तयार केला. फाटल्या दारान सागरमाला प्रकल्पाक प्रवेश दिवपाचो राज्य सरकाराचो हो डाव आशिल्ल्या आयतारा जाल्ले हळदोणे पंचायतीचे ग्रामसभेंत जेटी धोरणाक विरोध करपी थाराव मानून घेतलो. नव्या पंचायत मंडळाची ही पयलीच ग्रामसभा आशिल्ली. सरपंच आश्वीन डिसोझा हाचे येजमानके खाला पेरीस सेंटर सभाघरांत ही ती जाली. हळदोणे मतदारंसघाचे आमदार अॅड कार्लुस फेरेरा ह्या वेळार हाजीर आशिल्ले.
सरकारान पंचायतीक धाडिल्ल्या मसुद्यांत जेटी धोरणा संबंदी स्पश्टपणा ना. पंचायतीक विस्वासांत घेनास्तना हो मसुदो तयार केला. सरकाराचो तातूंत ल्हिपिल्लो अजेंडा आसा असो आरोप सरपंच डिसोझा हांणी ग्रामसभेंत केलो. निकोलस डासय आनी कॉझ्मी फर्नांडीस हांणी जेटी संबंदी सविस्तर म्हायती ग्रामसभेक दिली. ते उपरांत जेटी धोरणाक विरोध करपी थारावा पास केलो.
सुको कोयर दवोरपा खातीर खोर्जुव्यांत उबारिल्ले एमआरएप शेडी वयल्यान ग्रामसभेंत थोडो बोवाळ जालो. हे प्रकरण न्यायालयांत आशिल्ल्यान ताचेर उलोवपाक सरपंच डिसोझान न्हयकार दिलो. सरपंचाचे हे भूमिकेचेर कांय ग्रामस्थांनी तिडक उक्तायली. निकोलस डायस हांणी पंचायत वाठारांत लोकांनी कुडी भाड्यान दिल्यात तांची पळोवणी करपाची मागणी केली. भाड्यान रावपी ह्या लोकां कडल्यान पंचायतीक कसलोच कर मेळना अशें तांणी सांगलें. आपापल्या वॉर्डांत भाड्यान रावपी लोकांचें सर्वेक्षण करून तें पंचायतीक सादर करपाची सूचोवणी सरपंचान ह्या वेळार पंच वांगड्यांक केली.
पंचायत वाठारांतल्या पियेवपाच्या उदका पुरवणेचो प्रश्न ग्रामस्थांनी सरपंचाक विचारलो. लोक बुस्टर पंपांन उदक ओडून घेतात. ताचो परिणाम उदक पुरवणेचेर जाता अशे कॉझ्मी फर्नांडीस हांणी ग्रामसभेचे नदरेक हाडून दिलें. भौशीक बांदकाम खात्यान पत्र बरोवन हाचेर उपाय येजवण करपाची सूचोवणी लोकांनी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
