भांगरभूंय | प्रतिनिधी
लखनौ, खबरां संस्था ः हलाल प्रमाणीत उत्पादनांचेर सतत वाद निर्माण जावपाक लागल्यात. आतां उत्तर प्रदेशांतल्या योगी सरकारान राज्यांत हलाल प्रमाणीत उत्पादनांची विक्री करपाचेर बंदी घाल्या. राज्यांत तेल, शाबू, टूथपेस्ट सारकिल्ल्या हलाल प्रमाणीत शिवराक जिनसांची विक्री जाल्ली गजाल लक्षांत घेवन मुख्यमंत्री योगी आदित्यनाथ हांणी अधिकाऱ्यांक खर कारवाय करपाक सांगलां. शेनवारा सांजवेळार युपी सरकारान आदेश जारी करून राज्याच्या शिमे भितर हलाल प्रमाणीत उत्पादनांची विक्री करपाचेर बंदी घाल्ली.
मुख्यमंत्री योगी आदित्यनाथ हांच्या सुचोवण्यां प्रमाण वेगवेगळ्या उत्पादनांक हलाल प्रमाणपत्र दिवपी संस्थां आड लखनौ पुलीस आयुक्तालयांत एफआयआर केला. शेनवारा हजरतगंज पुलीस स्टेशनांत चेन्नयांतली हलाल इंडिया प्रायव्हेट लिमिटेड, दिल्लींतली जमीयत उलेमा हिंद हलाल ट्रस्ट, मुंबयची हलाल काउन्सिल ऑफ इंडिया, जमीयत उलेमा ह्या सारक्या कांय संस्थां आड केस नोंद जाल्ली.
शैलेंद्र शर्मा हांणी दाखल केल्ल्या एफआयआरांत हलाल प्रमाणपत्र आशिल्लीं कांय उत्पादनां एका विशिश्ट धर्माच्या गिरायकांक बेकायदेशीर रितीन विकतात असो आरोप आसा. एफआयआरांत कागाळदारान सांगलां की ह्या संस्थांक खंयच्याय उत्पादनाक अशें प्रमाणपत्र दिवपाचो अधिकार ना. हलाल प्रमाणपत्रां तयार करून आनी अर्थीक फायदो मेळोवन ह्या संस्थांनी लोकांक फटयल्यात असो आरोप तांणी केला. ह्या संघटनांनी ह्या वेवसायांतल्यान मेळिल्ल्या पयशांचो वापर राश्ट्रविरोधी वावरांत जाता असोय दावो तांणी केला.
हाची मुख्यमंत्री योगी हांणी खर दखल घेतल्या अशें उत्तर प्रदेश सरकाराच्या अधिकृत प्रवक्त्यान सांगलें. तशेंच अधिकाऱ्यांक खर कारवाय करपाची सुचोवणी दिल्या. हलाल प्रमाणपत्राक लागून देशांतलो जातीय एकचार नश्ट जावपाक लागला आनी ताचो फायदो राश्ट्रविरोधी शक्तींनी जावपाक लागला. शिवराक खाणांक हलाल प्रमाणपत्र दिवपाचें काम सुरू आसा. कायद्या प्रमाण आयएसआय आनी एफएसएसएआय ही अन्न उत्पादनांक गुणवत्ता प्रमाणपत्र दिवपा खातीर अधिकृत संस्था आसात आनी हेर अधिकृत संस्था नात. योगी सरकाराच्या हे कृती उपरांत राज्यांतल्या हलाल प्रमाणीत उत्पादनांची विक्री बंदी घालपाचे मार्ग सोदून काडपाक अन्न आनी वखदां प्राधिकरणाच्या अधिकाऱ्यांक सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
