भांगरभूंय | प्रतिनिधी
थळाव्या नागरिकांक, वेवसायिकांक सोंसचो पडटा मनस्ताप
हरमल: सद्या दर्यादेग वाठारांनी देशी पर्यटकांची गर्दी वाडिल्ल्यान खूबशा वाठारांनी येरादारीची कोंयडी जायत आसता. ह्या रस्त्यार फक्त एकूच होमगार्ड येरादारीचेर नियंत्रण दवरीत आशिल्ल्यान ताका मात सर्कस करची पडटा.
सेगीत सुटयेचो फायदो देशी पर्यटक घेत आशिल्ल्यान गांवगिऱ्या वाठारांतलो पर्यटन वेवसाय वाडीक लागला. पूण वाडट्या येरादारीक लागून हांगासरल्या रस्त्यांचेर मात ताण येवंक लागला. हाचो मनस्ताप चलून वचपी लोकांक आनी वेवसायिकांक जावंक लागला अशें थळावे नागरीक रामकृष्ण माज्जी हांणी सांगलें.
दर्यादेग रस्त्या वयल्या नाक्यार आनी रस्तो अशीर आशिल्ल्यान दोनूय वटांनी अस्ताव्यस्त पार्कींग जायत आसता, आनी हे खातीर येरादारीची कोंयडी सदचीच जाल्या. तिठो ते दर्यादेग रस्त्या मेरेनचो मार्ग नो पार्कींग म्हूण जाहीर करपाचे आदेश येरादारी विभागाच्या अधिकाऱ्यांनी प्रत्यक्ष पळोवणी वेळार केल्ले. पूण बेफिकीर पार्कींग चालूच आसता अशें वाहन चालक गजेंद्र धुरत हांणी सांगलें.
नाक्या वयल्या तिनूय वटांनी वाहनांची रांग लागत आशिल्ल्यान कोणूच वाहन चालक स्वता जावन वाहन कुशीक घेनात. ताका लागून येरादारीची कोंयडी जायत आसता अशें माज्जी हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
