भांगरभूंय | प्रतिनिधी
भांगरभूंय । प्रतिनिधी
वाळपयः स्मायल फावंडेशन ऑफ इंडिया आनी पेप्सीको संघटने वतीन वाळपयच्या श्री हनुमान विद्यालयांतल्या वट्ट 50 विद्यार्थ्यांक पणजे ताज हॉटले सभाघरांत जाल्ले खाशेले कार्यावळींत सायकली वितरीत केल्यो. स्मायल फावंडेशन देशांतले गरजू विद्यार्थी, बायलो, दळदीर रेषे सकयल्ली भुरगीं, आदिवासी, अनाथ भुरगीं हांका मजत करता. गांवगिऱ्या वाठारांत ताचें काम चड करून चलता. गोंयच्या गांवगिऱ्या वाठारांतली तांणी वेंचून काडिल्ली हनुमान विद्यालय ही एकसुरी शाळा आसा.
पोरूं फावंडेशनान हनुमान विद्यालयाक विज्ञान प्रयोगशाळे खातीर टेबलां तशेंच हेर गरजेचें साहित्य दिल्लें. हालिंसाराक वाहनांचो आंकडो हिसपाभायर वाडपाक लागला. ताका लागून प्रदूशण वाटडा आनी ताचो परिणाम पर्यावरणाचेर जावपाक लागला. लोकांनी प्रदूशण विरयत वाहनां वापरपाक जाय. ते विशीं जाग्रुताय करपा खातीर आमी भुरग्यांक सायकली दितात. ताका लागून ताचें शाळेंत वचप जाता आनी व्यायाम लेगीत जाता अशें फावंडेशनाचो अधिकारी विजय बसक हांणी सांगलें.
गोंयच्या गांवगिऱ्या वाठारांत वचून आनी भुरग्यांची परिस्थिती पळयतात. हनुमान विद्यालय आमच्या निकशांत बसता देखून तिची आमी निवड केली अशें तांणी सांगलें. हनुमान विद्यालय चलोवपी वाळपय शिक्षण संस्थेचो अध्यक्ष नरहरी हळदणकार, वेवस्थापक देवेश पेडणेकार, पदाधिकारी सदाशीव वेलिंगकार, सुविधा बर्वे, कल्पना बोर्येकार, दिलीप म्हार्दोळकाल सायकल वितरण कार्यावळीक हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
