हती लोकांक मेळपाक आयला… ताका मेळुंदी….. हें थारलें तांचें निमाणें विनोदी वक्तव्य

भांगरभूंय | प्रतिनिधी

पणजी : कायम हांसतूच रावपी रवी नायक हांकां दिलखुलास सभाव आनी विनोदी वक्तव्यां खातीर सगले वळखताले. सभाघरांत तशेंच जाहीर सभेंत विरोधकांचेर भियेनासतना आरोप करचे परस टिका, टिप्पणी करून सगल्यांचें लक्ष ओडून घेवपाचो तांचो सभाव आशिल्लो. हाका लागून विरोधकांची टिका आपोआप उणी जायत वताली.
फाटल्या सप्टेंबरांत महाराष्ट्राच्यान गोंयचे हद्दींत आयिल्ल्या ओंकार हतयान पेडणें वाठारांत शेती, बागायतीचो इबाड करून बरेंच लुकसाण केल्लें. हतयाचो बंदोबस्त करून शेती, बागायतीचें लुकसाण कशें आडायतले? शेतकारांक लुकसाण भरपाय केन्ना मेळटली? अशे प्रस्न पत्रकाराक कृषीमंत्री ह्या नात्यान तांकां विचारले. हती लोकांक मेळपाक आयिल्लो. मेळुंदी ताका. हती गणपतीचेंच रूप. गणेशाक आमी देव मानतात, अशें मिश्कील शैलींत तांणी जाप दिली. विधानभवनांत पत्रकारांक विनोदी शैलींत दिल्लें हें निमाणें उतर थारलें.
तांची उलोवपाची पद्धत आनी तराय विनोदी आशिल्ली. सभाघरांत मागण्यांचेर चर्चेक जाप दितना खात्याचे मंत्री वरांचीं वरां उलयतात. रवी नायक मात हाका आडवाद. अंदूंच्या पावसाळी अधिवेशनांत कृषी खात्याच्या मागण्यांचेर बरोच वेळ चर्चा जाली. आमदारांनी विवीध मागण्यो केल्यो. ‘तुमच्यो सगळ्यो मागण्यो हांव पुराय करतां. हाका लागून मागण्याक तुमी तेंको दिवचो’ इतलेंच उलोवन ते आपले सुवातेर बसले. तांची भलायकी सारकी नाशिल्ल्यान फाटल्या वर्सभर चड उलोवपूय तांकां शक्य नासलें.
रस्त्यांवेले खड्डे, अनियमीत उदकाची पुरवण हाका लागून सभाघरांत बांदकाम खात्याच्या कामाचेर विरोधकां कडल्यान सदांच टिका जाता. पर्रीकर मुख्यमंत्री आसतना डॉ. विल्फ्रेड डिसोझा, दयानंद नार्वेंकार, जितेंद्र देशप्रभू हांच्या प्रस्नांक विनोदी शैलींत वक्तव्यां करून ते मूळ प्रस्नाकूच कुशीक काडटाले.
एकदां डॉ. विलीनी हांणी साळगांवां सदांच उदकाचो उणाव आसता, असो प्रस्न केल्लो. साळगांवां उदकूच ना. हाका लागून उदकाचो उणाव आसूं येता, अशी जाप तांणी दिली. मागीर उदकाच्या पायपां खातीर कायम रस्ते कित्याक फोडटात? असो प्रस्न डॉ. विलींनी केलो. उदक नाशिल्ल्यान तें हेर सुवातेवेल्यान हाडपा खातीर रस्ते फोडचे पडटात, अशी जाप तांणी दिल्ली. तांचे हे जापेक सत्ताधार्‍यांनी बांक वाजोवन येवकार दिल्लो.