हणजूण दर्या देगे वयलें बांदकाम मोडपाचो गोंय खंडपिठाचो आदेश

भांगरभूंय | प्रतिनिधी

भांगरभूंय । प्रतिनिधी
पणजीः हणजूण दर्या देगेर सर्वे नंबर 73/1 हातूंत केल्लें बेकायदेशीर बांदकाम बेगोबेग मोडून उडोवचें तशेंच तें करून पर्यावरणाचे लुकसाण केल्ले खातीर 5 लाख रुपयांचो दंड फारीक करपाचो आदेश मुंबय उच्च न्यायालयाच्या गोंय खंडपिठान दिला. थळावी पंचायत आनी गोंय दर्या देग वेवस्थापन प्राधिकरणान ह्या वाठारांतल्या हेर बांदकामाची तपासणी करपाचो सूचोवणी केल्या.
संबंदीत बांदकामा आड रमेश मुझुमदार हांणी याचिका सादर केल्ली. 26 ऑगस्टाक ताणे हणजूण पंचायतींत कागाळ केल्ली. पंचायत मंडळान कसलीच कारवाय केली ना म्हणून तांणी खंडपिठांत धांव घेतिल्ली.  दर्या देग प्राधिकरणान 4 आनी 5 आक्टोबराक बांदकामाची पळोवणी करून खंडपिठाक स्थितीजन्य अहवाल सादर केल्लो. खंडपिठांत याचिकेची सुनावणी सुरू आसना लेगीत बांदकाम सुरू दवोरलां अशें प्राधिकरणान सांगल्लें. फाटल्या 11 ऑक्टोबराक जाल्ले सुनावणे  वेळार खंडपिठान बांदकामाक कुलूप लावपाक सागून आगुस्ता डिसोझा हाका प्रतिज्ञापत्र सादर करपाक सांगल्लें.
मंगळाराक जाल्ले सुनावणे वेळार संबंदीत जमीन लिझाचेर दिल्या. लिझधारक आयुष्य चौधरी आनी मृत्यूंजय त्रिपाठी हांचे कडल्यान पांच लाख रुपये घेतल्यात आनी दर म्हयन्याक 2 लाख रुपये दिवपाचे थारलां अशी म्हायती खंडपिठाक दिली.