भांगरभूंय | प्रतिनिधी
-सीआरझॅडच्या सर्वेक्षण पंगडाक धाडले परतून
म्हापशेंः हणजूण दर्यादेग वाठाराचो सर्व्हे करपाक थळाव्यांनी हरकत घेवन विरोध केलो. तशेंच सर्वेक्षण करपाक आयिल्ल्या गोंय दर्यादेग क्षेत्र वेवस्थापन प्राधिकरणाच्या सवेक्षण पंगडाक परतून धाडले. सरकारान सीआरझॅड आनी न्यायालयाच्या नांवा खाला थळाव्यांची छळणूक करची न्हय, नाजाल्यार लोकसभा वेंचणुकेचेर बहिश्कार घालतले, अशी शिटकावणी नागरिकांनी दिली.
कसलीच नोटीस वा पूर्वसुचोवणी दिनासतना फक्त उच्च न्यायालयाच्या आदेशाची कार्यवाही करपा खातीर परतून परतून सर्वे करपाक दिवचे नात. पयली कायदेशीर नोटीस दियात, उपरांत सर्वे करपाक दितले, असो निश्चेव वेवसायीक नागरिकांनी केलो.
बिरेस्तारा सकाळीं गोंय दर्यादेग क्षेत्र वेवस्थापन प्राधिकरणाचो सर्वेक्षण पंगड हणजूण दर्यादेग पुलीस बंदोबस्तात दाखल जालो. ह्या वेळार ह्या सर्वेक्षण प्रक्रियेक अॅड. जतीन नायक हांचे सयत नरेश
हरमलकार, योगेश गोवेकार, रोहन नायक, मायकल आनी हेर थळाव्यांनी आक्षेप घेवन काम आडायलें.
सीआरझॅडच्या पंगडान सर्वेक्षणाच्या कामा विशींचीं सगलीं कागदपत्रां ह्या वेळार सादर केली. तशेंच पुलीस उपनिरिक्षक धीरज देविदास हांणी ह्या पंगडाक तांचें काम करपाक दिवपाची सुचोवणी थळाव्यांक केली. पूण जे मेरेन योग्य नोटीस मेळना, ते मेरेन सर्वे करपाक दिवचे नात, अशें थळाव्यांनी सांगलें. ताका लागून सर्वेक्षण पंगडाक परतून वच्चे पडले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
