हणजूण्यां स्फोट जाल्लो सिलिंडर आदळिल्ल्यान तरणाट्याक मरण

भांगरभूंय | प्रतिनिधी

कॅफे रॅस्टोरंण्टाची धनी जखमी; सुमार 2 लाखाचें लुकसाण

म्हापशें: पिकेन-पेडें हणजूण्यां लागिल्ल्या उज्यांत कॅफे रॅस्टोरंण्टाच्या धनयाक वाटावन भायर उबो राविल्लो डेन्सन डिसोझा (40, रा. हणजूण) हाका दुर्दैवी मरण आयलें. स्फोट जाल्लो गॅस सिलिंडर ताका आदळ्ळो आनी हे दुर्घटणेंत ताका जाग्यारूच मरण आयलें. जाल्यार उज्यांत हुलपल्ल्यान रेश्मा उसकयकार (39) ही बायल गंभीर जखमी जाली.

सोमारा 24वेर सांजवेळा 7 वरांच्या सुमाराक ही दुर्दैवी घडणूक घडली. जखमी रेश्मा उसकयकार ह्यो कॅफेंत लक्ष्मी पुजनाची तयारी करताल्यो. त्याच वेळार दिवो पेटयिल्ल्यान उजो लागलो. ह्या उज्यान रोखडोच पेट घेतलो. हो उजो पालयतना उसकयकार हुलपल्यो. तिचो बोवाळ आयकून मयत डेन्सन डिसोझा आनी हेर शेजाऱ्यांनी घडणूक थळार धांव घेतली आनी कॅफेंत घुसून तांणी जखमीक सुखरूप भायर काडली.

घडणुकेची खबर 108 एम्बुलन्सीक आनी उजो पालोवपी दळाक दिली. ह्या दोनूय आपतकालीन सेवांची वाट पळयत ते सगले जाण रॅस्टोरंण्टा भायर उबे राविल्ले. तेन्ना भितरल्या गॅस सिलिंडराचो स्फोट जालो आनी हो सिलिंडर नेमको येवन डेन्सन डिसोझाचेर आदळ्ळो. सिलिंडराचो धपको इतलो खर आशिल्लो की मयत जमनीर कोसळ्ळो आनी जखमी जालो.

उपरांत कांय वेळान एम्बुलन्स आनी उजो पालोवपी दळाचे जवान घडणूक थळार दाखल जाले. एम्बुलन्सींतल्यान दोनूय जखमींक जिल्हो हॉस्पिटलांत दाखल केले. थंय डेन्सन डिसोझाक मरण आयिल्ल्याचें जाहीर केलें. जाल्यार जखमी रेश्मा उसकयकार हिचेर उपचार सुरू आसात.

उजो पालोवपी दळाच्या जवानांनी उजो पालोवपाचें काम हातांत घेवचे पयलींच पुराय रॅस्टोरंण्ट लासून गोबर जाल्लें. ह्या उज्यांत फ्रीज, एक दुचाकी, लांकडी पाखें आनी कॅफेक लागपी हेर साहित्य लासून गोबर जालें. हातूंत अदमाशेक दोन लाखांचें लुकसाण जालां.

उजो पालोवपी दळाचे हवालदार प्रकाश कान्नायक, विष्णु ताटे, अशोक वळवयकार आनी देवेंद्र नायक ह्या जवानांनी उजो पालयलो. हणजूणचे पुलीस उपनिरिक्षक तेजेशकुमार नायक हांणी घडणुकेचो पंचनामो केलो. फुडलो तपास सुरू आसा.

मयत डेन्सन डिसोझा हो ताच्या सेवाभावी वृत्तीक लागून गांवांत तो वळखीचो आशिल्लो. कोणाच्याय अडीअडचणीक धांव घेवन मजत करपाक डेन्सन सदांच मुखार आसतालो. ताका लागून ताच्या ह्या अपघाती मरणाक लागून इश्ट परिवारांत दुख्ख पातळ्ळां.