हणजूण्यां लाखांनी चौखण मिटर जमीन लाटली

भांगरभूंय | प्रतिनिधी

एसआयटी मुखार तपासाचें आव्हान; कोमुनिदाद जमनिंकूय धनी ना

म्हापशें: हणजूण-कायसूव पंचायत वाठारांत कोमुनिदाद जाग्यार कांय जाणांनी बेकायदो रितीन डल्लो मारला. सद्या गोंयांत जमीन हडप केल्ल्याची प्रकरणां गाजत आसतनाच हणजूण्यां अशे प्रकार उक्ताडार येत आसात. हे संबंदी कोमुनिदाद प्रशासनाक कल्पना आसून लेगीत सत्य उक्तें करपा कडेन आडनदर जायत आसा. मरण आयिल्ल्या मनशाच्या नांवान कोमुनिदादीची जमीन भायले भायर विकल्या. बनावट दस्तावेजाच्या माध्यमांतले नोंदींनी घोळ करून जमीन विकपाचे प्रकार सर्रासपणान घडल्यात.

बार्देस म्हालांतल्या हणजूण गांवांतल्या सर्वे क्रमांक 436/1 मदल्या जमीन हस्तांतरणांत व्हड घोळ जाला. ‘कांटेमुणगा’ तशेंच ‘कांटेमुणगा चिवार र’ ‘कांटे मुणांग चिवार’ ह्या नांवान वळखुपी आनी भूंय-नोंदणी दस्तावेजांत क्र. 5224, अनुक्रमणणिका क्र. 801, फोलिओ क्र. 156 ह्या टोम्बो सेगुंदो ‘ब’ पुस्तकांत नोंद आशिल्ली आनी हणजूण गांवच्या केडस्ट्रल क्र. 510त आस्पावीत कोमुनिदादच्या जमीन विक्री आनी हस्तांतरणांत घोटाळो जाला.

हणजूण कोमुनिदादीन सर्गेस्त डुराटे फ्रान्सिस्को डिसोझा हांकां 6 जानेवारी 1913 दिसा 340 चौखण मिटर जमीन कायम तत्वा वयल्या लिजार घर बांदणी खातीर दिल्ली. 27 ऑगस्ट 1908 दिसा तांणी हंगामी तत्वाचेर जमीन दिल्ली आनी 6 जानेवारी 1913 दिसा ती कायम केल्ली. हातूंतली अधिकतम जमीन हस्तांतरणाचो दस्तावेज पळयतकूच 28 ऑगस्ट 1952 दिसा कोमुनिदाद प्रशासकान आफ्रामेंत जमनीचो एक तृतियांश भाग म्हणल्यार 32166 चौखण मिटर जमीन कायम स्वरुपी तत्वाचेर स. डुराटे फ्रान्सिस्को डिसोझा उर्फ डुराट फ्रान्सिस्को मिंगेल जॉन लुईस डिसोझा हांकां दिलो. तो तेन्नाचे गव्हर्नर जनरल हांच्या आदेशान 18 जुलय 1952 दिसा दिवपाचें सोपस्कार जाल्ले. पूण हो दस्तावेज बोगस आशिल्ल्याचें उपलब्ध म्हायती वयल्यान लक्षांत येता.

अजापाची गजाल म्हणल्यार ज्या डुराटे हांणी ही जमीन दिल्ल्याची कागदपत्रां तयार केलीं तांकां 2 नोव्हेंबर 194 दिसा मरण आयिल्लें. अशें आसतना 28 ऑगस्ट 1952 दिसा डुराटे हांकां आफ्रामेंत जमीन कशी हस्तांतरीत केली असो प्रस्न उपस्थीत जाला.

ह्या प्रकरणांत आनीक एक घुस्पागोंदळ वाडला. 16 ऑक्टोबर 1952 दिसा सेल गिफ्ट डीड (खरेदीपत्र इनाम) केलें. तें स. मधू दादा पार्सेकार हांकां स. डुराटे फ्रान्सिस्को डिसोझा उर्फ डुराट फ्रान्सिस्को मिंगेल जॉन लुईस डिसोझा आनी तांची घरकान्न नातालिना फॉस्तिन्हा मारिया ई रोचा डिमेलो हांचे वतीन विकली. ही जमीन पार्सेकार हांकां नांवाचीच म्हणल्यार 850 रुपयांक विकली. हे संबंदीचें खरेदीपत्र हें गिल्हमेरे डायगो जोस कोन्सासिओ डास डोरेस लोबो अशी म्हापश्यां नोटरी नोंदणी आसा.

श्रीमती नातालिना फॉस्तिन्हा मारिया ई रोचा हिच्या मरण दाखल्यांत मात तिच्या घोवाचें नांव पास्कॉल डिसोझा अशें नोंद आसा. हाचे वयल्यान जें खरेदीपत्र वा हेर दस्तावेज तयार केले ते बनावट आनी भलत्याच कोणाक संबंदीत व्यक्ती म्हूण दाखोवन 16 ऑक्टोबर 1952 दिसा केले अशें हातूंत तथ्य दिसून येता.

कोमुनिदाद कायदो आनी नेम 1933 प्रमाण आर्टिकल 416 हे कोमुनिदाद आफ्रामेंत जमीन फक्त लागवडी खातीर 3 हॅक्टर इतलीच दिवंक मेळटा आनी घर बांदपा खातीर 1 हजार चौखण मिटर इतलीच जमीन दिवंक मेळटा हें स्पश्ट करता. ताका लागून नेम खुंटयाळ्याक लावन ही जमीन दिल्ल्याचें स्पश्ट जाता.

कांय विशिश्ट स्थितीतूच हे फास्के भायर जमीन दिवं येता, पूण ते संबंदीची प्रक्रिया पार पाडची पडटा. जे सर्गेस्त मधू सदा पार्सेकार हांणी ती जमीन घेतली, तांच्या वारसदारांक त्या जमनींतले 5930 चौखण मिटर जमीन 13 फेब्रुवारी 2018 दिसा खरेदीपत्र करून जोडप्याक विकली. ताची नोंदणी बार्देस उपनिबंधका कडेन (सब रजिस्ट्रार) 15 फेब्रुवारी 2018 दिसा जाल्या. स. मधू पार्सेकार हांणी विकती घेतिल्ली जमीन ही घोटाळ्या वरवीं आनी बोगस दस्तावेजांतल्यान हस्तांतरीत जाल्या. ताचे पार्टिशनूय जालां आनी कोमुनिदादची स्थावर जंगम मालमत्ता आनी जमीन ही गांवकार, जाणकार हांचीच आसता. हाका लागून एखादो बदल, फेरफार वा हस्तांतरण हे कोमुनिदाद कोड कायद्या प्रमाणूच करप बंधनकारक थारता.

ह्या प्रकरणांत कोट्यांनी रुपयांचो वेव्हार जाल्लो आसून हणजूण्यां ह्या जमनीचें मोल कोट्यांनी रुपयांच्या घरांत आसा. म्हणूनच ह्या बोगस प्रकरणांत सरकारान तशेंच एसआयटीन चवकशी केल्यार खूबशीं व्हडलीं नुस्तीं गरयेक लागतलीं. हातूंत एका आदल्या मंत्र्याचोय आस्पाव आशिल्ल्यानूच ह्या घोटाळ्याच्या मुळांत वचून तपास यंत्रणा घडये वचना आसत असो दुबाव लोक उक्तायतात.

‘ग्रेझींग लॅण्डा’चेरूय डल्लो

कोमुनिदाद कोड प्रमाण ‘पास्ता जान’, ‘ग्रेझींग लॅण्ड’ कोणाकूय दिवंक मेळना. पूण हणजूण्यां हो प्रकार घडला. 6 लाख चौखण मिटर जमीन हडप करपाचो डाव रचिल्लो. कोमुनिदाद प्रशासनान हाचे कडेन आडनदर कशी केली असो प्रस्न उपस्थीत करून सर्वे क्र. 496/1 आनी 496/1ए च्या हस्तांतरणाची तशेंच वयली जमीन खरेदी विक्री प्रकरणाची चवकशी जाल्यार हातूंत गुथिल्ले उक्ताडार येतले असो दावो रहिवाश्यांचो आसा.