भांगरभूंय | प्रतिनिधी
थळाव्या लोकांचो पेयजल पुरवण कार्यालयाचेर मोर्चो
भांगरभूंय । प्रतिनिधी
म्हापशें : हणजूणें आनी आसगांवां जावपी अनियमीत उदक पुरवणे वयल्यान थळाव्या लोकांनी पेयजल पुरवण खात्याच्या म्हापशें कार्यालयाचेर मोर्चो व्हेलो. फाटल्या दोन म्हयन्यां सावन गांवांत नियमीत उदक पुरवण जायना. ही समस्या सुटावी करचे खातीर कृती आराखडो तयार करपाक खातें अपेशी थारलां, असो आरोप मोर्चो व्हेल्ल्या लोकांनी केला.
मंगळारा सकाळीं आसगांव आनी हणजूणेंच्या कांय लोकांनी म्हापशेंच्या पेयजल पुरवण खात्याच्या कार्यालयाचेर मोर्चो व्हेलो नी अधिकाऱ्यांक अनियमीत उदक पुरवणे संबंदांत जाब विचारलो.
फाटल्या 20 वर्सां परस अदीक काळ आमी उदकाचे समस्येक फुडो करतात. पोरणी उदकाची पायपलायन बदलून लेगीत थंय अजून कसलोच बदल जावंक ना. ताका लागून उदक खंय वता, असो प्रस्न मोर्चो व्हेल्ल्या लोकांनी केलो.
कायसूवची अमिता नागवेंकार हांणी सांगलें, आमकां फाटल्या तीन म्हयन्यां सावन उदक मेळना. मात रातच्या वेळार हॉटेलांक उदक सोडटात. आमच्या नळाक सकाळीं उदक सोडचें, अशी आमची इत्सा आसा. खूब काळा सावन ह्या कार्यालयांत आशिल्ल्या कर्मचाऱ्यांची बदली करची, अशीय तांणी मागणी केली.
निलेश गोवेकार हांणी सांगलें, कनिश्ठ अभियंते आमची समस्या सोडोवपाक अपेशी थारल्यात. मुख्य पायपलायनीचे व्हॉल्व आमचे खातीर बंद आसात. थंयच्यान फक्त मार्ना शिवोलीक उदक सोडटात, ताका लागून आसगांवांक उदक मेळना.
पार्वती नागवेंकार हांणी सांगलें, आमकां नवे पायपलायनींतल्यान उदक मेळटलें, अशें आस्वासन आमकां आठ म्हयन्यां आदीं दिल्लें, पूण समस्या अजून सुटावी जावंक ना. ही समस्या सुटावी केली ना जाल्यार धरणे आंदोलन करतले, अशी शिटकावणी तांणी दिली.
सहाय्यक अभियंत्यांनी सांगलें, दोन दिसां खातीर पायपलायनींतली उदका पुरवण बंद दवरिल्ली. ताका लागून उदक पुरवणेचेर परिणाम जावं येता. पूण थळाव्या लोकांच्या म्हणण्या प्रमाण तांकां खूब दिसां सावन उदक मेळूंक ना. हे खातीर व्हॉल्व वेवस्थापन तपासचें पडटलें. पोरणी पायपलायन बदल्ले उपरांत परिस्तिती सुदारल्या. आसगांव उदक शुद्धीकरण प्रकल्प सुरू जाले उपरांत ही समस्या सासणाची सुटावी जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
