भांगरभूंय | प्रतिनिधी
नायजेरियनाक अटक
भांगरभूंय प्रतिनिधी
पणजी ः गोंय पुलिसांच्या घुंवळे वखदां विरोधी पथकान (एएनसी) तेंबी-हणजुण्यां मंगळारा मध्यानरातीं धाड घालून उग्वेलिहे संडे उग्वूओके (43, रावपी पर्रा, बार्देश) ह्या नायजेरियन नागरिकाक अटक केल्या. ताचे कडल्यान एएनसीन 32.33 लाख रुपया मोलाचीं 323.38 ग्राम घुंवळे वखदां जप्त केलीं.
घुंवळे वखदां विरोधी पथकान दिल्ले माहिती प्रमाण, तेंबी-हणजुण्यांतल्या हणजूण जिमखाना मैदाना लागसार मंगळारा मध्यानरातीं घुंवळे वखदांची तस्करी जावपाची आसा अशी खबर पथकाक मेळिल्ली. त्या प्रमाण एएनसीचे अधिक्षक शोबित सक्सेना आनी उपअधिक्षक नेर्लोन आल्बुकर्क हांच्या मार्गदर्शना खाला पुलीस निरिक्षक रमेश शिरोडकार हांच्या फुडारपणा खाला महिला उपनिरिक्षक प्रियंका गरोडी, काॅन्स्टेबल संदेश वळवयकार, रुपेश कांदोळकार, नितेश मुळगांवकार, सुदीन लिंगुडकार, मंदार नायक आनी हेर कर्मचाऱ्यांनी मंगळारा मध्यानरातीं 1.20 ते फांतोडेर 5 मजगतीं वयले सुवातेर सांपळो रचलो.
ह्या वेळार गुप्तहेरांनी दिल्ले माहिती प्रमाण ते सुवातेर उग्वेलिहे संडे उग्वूओके हो नायजेरियन नागरीक आयलो. पथकान ताका ताब्यांत घेवन ताची झडटी घेतली. त्या वेळार ताचे कडल्यान पथकान 32,33,800 रुपया मोलाचें 213.56 ग्राम हेराॅईन आनी 109.82 ग्राम एमडीएमए हें घुंवळे वखद जप्त केलें.
उपरांत पथकाचे पुलीस उपनिरिक्षक मंजुनाथ नायक हांणी दुबावितां आड घुंवळे वखदां विरोधी कायद्याच्या कलमा खाला गुन्यांव नोंद करून ताका अटक केली.
अटक केल्ल्या दुबावीत उग्वेलिहे संडे उग्वूओके हाका बुधवारा सांजवेळा म्हापशेंच्या पयलो वर्ग न्यायालयांत हाजीर केलो. न्यायालयान ताका पांच दिसांची पुलीस कोठडी फर्मायल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
