भांगरभूंय | प्रतिनिधी
भांगरभूंय । प्रतिनिधी
म्हापशेंः केंद्र सरकाराच्या स्ट्रीट लायट राष्ट्रीय कार्यावळी खाला गोंयच्या वीज खात्यान रस्त्यांचेर एलईडी दिवे लायल्यात. मात हे कार्यावळीचो लाब हडफडें- नागवा पंचायत वाठाराक जाल्लो ना अशें सरपंच रोशन रेडकार हांणी सांगून पंचायत वाठारांतल्या रस्त्यांनी हे दिवे लावपाची मागणी केल्या.
गोंय सरकारान 2016 वर्सा रस्त्यांनी एनर्जी इफेनीएन्सी सर्व्हिसेस (ईईएसएल) आनी भारत विकास ग्रुप (बीव्हीजी) कंपनी वतीन एलईडी दिवे बसोवपाचें काम केल्लें. ते खातीर कोट्यांनी रुपया खर्च केल्लें. एलईडी दिवे बसोवप आनी तांची 10 वर्सा देखभाल करप अशें कंत्राटाचें स्वरूप आशिल्ले. मात ते उपरांत ह्या कंपनीन देखभाल करपाचें सोडून दिलें आनी 2020 वर्सा राज्य सरकारान वीज खात्या वरवीं देखभाल करपाचो निर्णय घेतिल्लो.
हडफडें- नागवा पंचायत वाठारांत एलईडी दिवे बसोवपाचें काम जालें ना. थळाव्या वीज कार्यालया वतीन कंत्राटदार आनी वीज खात्याक पत्रां धाडलीं तरी तांची कोणेच दखल घेतली ना अशें रोशन रेडकारान सांगलें. सद्या रस्त्यां कडच्या दिव्यांची समस्या पंचायत मंडळा सामकार आसा. वीज खात्यान आमका सापत्नपणाची वागणूक दिली आनी सरकारी येवजणेचो लाब आमकां घेवपाक दिलो ना असो आरोप करून एलईडी दिवे बसोवपाची वेवस्था करची अशी मागणी तांणी वीज मंत्री सुदिन ढवळीकार हांचे कडेन केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
