भांगरभूंय | प्रतिनिधी
मुख्यमंत्री डॉ. प्रमोद सावंतः सांखळे गांवगिऱ्या वाठारांतल्या भुरग्यां खातीर मार्गदर्शन कार्यशाळा
भांगरभूंय । प्रतिनिधी
दिवचलः गोंयांतल्या गांवगिऱ्या वाठारांतल्या सुशिक्षीत भुरग्यांक राज्य, देश आनी संवसारीक पांवड्याचेर वेगवेगळ्या रोजगार संदींचो लाव मेळोवपा दितले. ते खातीर गोंय सरकारान अनिवासी भारतीय कमिशना वांगडा कबलात केल्या. चड करून वैजकी मळा वयल्या विवीध विभागा वांगडाच हेर साबार मळांचेर आशिल्लो संदी गोंयच्या भुरग्यांक मेळच्यो आनी स्कील इंडिया ह्या नव्या मंत्रालयाच्या माध्यमांतल्यान साबार रोजगार आनी वेवसायाच्यो हजारांनी संदी उपलब्ध करून दिवपाचे सरकार विशेश यत्न करता, अशें मुख्यमंत्री डॉ. प्रमोद सावंत हांणी सांगलें.
पद्मिनी फावंडेशन आनी स्कील इंडिया हांच्यो जोडपालवान उच्च शिक्षीत गांवगिऱ्या आनी शार वाठारांतल्या सुमार 250 भुरग्यांचे हाजिरेंत देश, राज्य आनी संवसारीक पांवड्याचेर आशिल्ल्यो संदी हाचेर मार्गदर्शन करचे खातीर विशेश कार्यशाळा आयोजीत केल्ली. ही कार्यावळ सांखळेच्या रवीन्द्र भवनांत जाली.
ह्या वेळार माचयेर मुख्यमंत्र्यां वांगडा भाजपा मंडल अध्यक्ष गोपाळ सुर्लकार, संतोष मळीक, विठोबा घाडी, शिखर सक्सेना, सिद्धार्थ सावकार, रामू वेणूगोपाळी, वेलंटायन इथंडी, पुजा मयेंकार, श्रीकांत गोसावी, हर्षा सक्सेना, भारती शर्मा आनी हेर मानेस्त हाजीर आशिल्ले.
शेंकड्यांनी भुरगे उच्च शिक्षण, विवीध पदव्यो घेवन ओग्गी बसल्यात. सरकारीच नोकरी जाय, अशें बाणीर बोट दवरून ते रावल्यात. हो हट्ट उपेगाचो ना. आयज कौशल भारत मंत्रालयाच्या माध्यमांतल्यान शेंकड्यांनी मळांचेर खूब संदी आसात. गांवगिऱ्या भुरग्यांक ते संबंदांत मार्गदर्शन मेळचें, हे खातीर हो पयलो यत्न आसा. सगळ्याच वाठारांनी अशें मार्गदर्शन उपक्रम हातांत घेतले, अशें मुख्यमंत्री डॉ. सावंत हांणी सांगलें.
देश पांवड्याचेर विवीध मळांचेर वावर करपी स मुखेल उलोवप्यांनी उपलब्ध रोजगार वेवसायीक संदी हे विशीं अभ्यासपूर्ण मार्गदर्शन केलें.
संतोष मळीक हांणी कार्यावळ आयोजनाची म्हायती दिली.
हे कार्यावळींत पदवी, पदव्युत्तर विद्यार्थ्यांचो पद्मिनी फावंडेशना वतीन मुख्यमंत्र्यांचे हस्तुकीं भोवमान केलो. पुजा मायणीकार, लक्ष्मण गांवस आनी सर्वेश नायक हांणी सुत्रसंचालन केलें.
जागे जायात, संदीचें भांगर करातः मुख्यमंत्री
वेगवेगळे उद्देग, नोकऱ्योच्यो संदी आसात. त्यो मेळोवचे खातीर सरकार स्पर्धात्मक परिक्षा, वेवसायीक शिक्षण, कुशळटाय उदरगत मार्गदर्शन असो सगळे वटेन यत्न करता. तरणाट्यांनी आपल्या शिक्षणाचो उपेग फक्त सरकारी नोकरी हीच मोख दवरिनासतना येसस्वी वेवसायीक जावन हेरां खातीर रोजगाराच्यो संदी निर्माण करपाची मोख बाळगुची, होवूय हे फाटलो उद्देश आसा. आयज गोंयांत खूब संदी आसात, पूण गोंयचे सुशिक्षीत तरणाटे घरा बसून आसात. दुसऱ्या राज्यांतले खूबशे तरणाटे संदीचो फायदो घेतात. हें चित्र बदलपाक जाय. जागे जायात आनी संदीचें भांगर करात, असो उलो मुख्यमंत्री डॉ. प्रमोद सावंत हांणी मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.