भांगरभूंय | प्रतिनिधी
राज्य, जिल्हो, गांव पांवड्याचेर 4095 किमि रस्त्यांचीं कामां
भांगरभूंय । प्रतिनिधी
पणजी : राज्य, जिल्हो आनी गांव पांवड्याचेर रस्त्यांचेर फाटल्या स वर्सांच्या काळांत सरकारान सुमार 1556 कोटीं रुपया खर्च केल्यात. ह्या खर्चांतल्यान 4095 किलोमिटर रस्त्यांचें बांदकाम आनी दुरुस्ती केल्या, अशें भौशीक बांदकाम खात्याच्या (पीडब्ल्यूडी) एका अहवालांतल्यान मुखार आयलां.
1 जानेवारी 2019 सावन पीडब्ल्यूडीन गांव पांवड्याचेर 23 रस्त्यांचीं कामां हातांत घेतलीं. तातूंत कांय वाठारांनी नवे रस्ते बांदले जाल्यार कांय वाठारांनी रस्त्यांची दुरुस्ती केली. ह्या काळांत गांव पांवड्याचेर 124.62 किलोमिटर रस्त्यांची कामां खात्यान केलीं. ताचेर 199.85 कोटींचो खर्च केलो. जिल्हो पांवड्याचेर 339.15 किलोमिटर रस्त्यांचीं कामां ह्या काळांत केलीं. ताचेर 224.31 कोटी रुपया खर्च केले. खात्यान ह्या स वर्सांच्या काळांत सगळ्यांत चड खर्च गांव पांवड्या वयल्या रस्त्यांचेर केला. गांव पांवड्याचेर 3630.54 किलोमिटर रस्त्यांचीं कामां ह्या काळांत केलीं. ताचेर 1131.88 कोटींचो खर्च जाला, अशें अहवालांतले आंकडेवारींतल्यान दिसून येता.
गोंयांतल्या लोकां खातीर पीडब्ल्यूडी हें खूब म्हत्वाचें खातें आसा. लोकांची मुळावी गरज आशिल्ले रस्ते, उदक दिवपाचें काम हें खातें करता. ताका लागून गोंय सरकार दरवर्साच्या अर्थसंकल्पांत पीडब्ल्यूडी खातीर कोटींनी रुपयांच्या निधीची तजवीज करता. तातूंतलो सगळ्यांत चड निधी रस्ते बांदपाक आनी दुरुस्तीचेर खर्च जाता, अशेंय अहवालांत म्हणलां.
मुख्यमंत्र्यांचे शिटकावणेक लागून कंत्राटदार, अभियंत्यांक भंय
गोंयांतल्या रस्त्यांचेर सरकार दरवर्सा कोटींनी रुपया खर्च करता. पूण रस्त्यांच्या कामांत कंत्राटदार आनी अभियंत्यां कडल्यान जावपी भ्रश्टाचाराक लागून पयल्याच पावसांत काँक्रिटाचे रस्ते व्हांवून वतात. हाची गंभीर दखल घेवन कांय म्हयन्यां आदीं मुख्यमंत्री डॉ. प्रमोद सावंत हांणी कंत्राटदार आनी अभियंत्यांक ‘कारणां दाखयात’ नोटिसो जारी करून, तांणी बांदिल्ले जे रस्ते पेड्डेर जाल्ले, तांची दुरुस्ती तांच्याच खर्चान करून घेतिल्ल्यान कंत्राटदार आनी अभियंते जाग्यार आयल्यात, हें चित्र फाटल्या कांय दिसांनी स्पस्टपणान दिसपाक लागलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
