भांगरभूंय | प्रतिनिधी
महसूल मेळ्ळो 893.31 कोटी; 951.11 कोटी खर्च
पणजी: कदंब म्हामंडळाक फाटल्या स वर्सांत 57.80 कोटींचें लुकसाण जालां. ह्या काळांत म्हामंडळान 893.31 कोटींचो महसूल एकठांय केला. पूण 951.11 कोटी म्हामंडळाचेर खर्च केले अशी म्हायती येरादारी मंत्री मॉवीन गुदिन्हो हांणी विधानसभेंतल्या लेखी प्रस्नाचे जापेंतल्यान दिली. आमदार दिगंबर कामत हांणी हे विशीं प्रस्न विचारिल्लो.
2017 सावन आतां मेरेन म्हामंडळान वट्ट कितल्यो बशी विकत्यो घेतल्यात ह्या प्रस्नाचे जापेंत 2017 ते आतां मेरेन म्हामंडळान सुमार 24.26 कोटींच्यो वट्ट 64 नव्यो बशी खरेदी केल्यात. हातूंत टाटा मिनी बस, वोल्वो, सेमी लक्झरी, स्वराज माझदा ह्या सारक्या बशींचो आस्पाव आसा. म्हामंडळाक 57 बशी फुडल्या वर्सभरांत बदलच्यो पडटल्यो अशें मंत्री गुदिन्हो हांणी सांगलें.
मजगतीं, म्हामंडळाच्या बशींची फाटल्या साडेचार वर्सांत 28,32,300 रुपयांचें लुकसाण जालें.2017-18 वर्सा 2,72,700, 2018-19 वर्सा 3,40,000, 2019-20 वर्सा 16,63,100, 2020-21 वर्सा 3,32,000 आनी 2021-22 वर्सा 2,23,500 रुपयांचे बशीच्या लुकसाणीचेर खर्च करचे पडले अशेंय मंत्री गुदिन्हो हांणी जापेंत नमूद केलां.
—————
कोरोनाक लागून चड लुकसाण
गोंयांत मार्च 2019 सावन कोवीड म्हामारीक सुरवात जाली. कोविडाचेर मात करपा खातीर कितलेशेच म्हयने लॉकडावन, जनता कर्फ्यूची अंमलबजावणी केली. ताका लागून म्हामंडळाच्यो बशी खूबशे म्हयने जाग्यारूच उब्यो आशिल्ल्यो. गोंया भायलो प्रवास आडाविल्लो. ताका लागून म्हामंडळाक चड लुकसाण सोंसचें पडलें असो दावो मंत्री मॉवीन गुदिन्हो हांणी जापेंत केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
