भांगरभूंय | प्रतिनिधी
म्हापशें, प्रतिनिधीः पुलीस ड्यूटी मास्टरा संबंदीं जायत्यो कागाळी आयल्यो आनी आरोपूय जाले. हे संबंदी आनीक आरोप जावचे न्हय देखून पुलीस खात्यान राज्यांतल्या सगल्या पुलीस स्टेशनांक आनी खात्याच्या मुखेल्यांक दर स म्हयन्यांनी ड्युटी मास्टर बदलपाची सुचवणी दिल्या. हे संबंदी हो आदेश पुलीस मुख्यालयाचे अधीक्षक नेल्सन आल्बुकेर्क हांणी जारी केला.
कांय ड्युटी मास्तर पुलिसांनी ड्युटी घालतना पक्षपातीपणा करतात तशेंच कांय कडेन कांय पुलीस आनी ड्यूटी मास्तर हांचे मदीं गोंदळ चालूच आसता अशे खुबशे आरोप जातात. फुडाराक अशे आरोप जावचे न्हय देखून दर स म्हयन्यांनी ड्यूटी मास्तर बदलचे. तशेंच बदलिल्ल्या ड्यूटी मास्तराची परत ते सुवातेर नियुक्ती करची न्हय असो निर्णय घेवन पुलीस खात्यान तसो आदेश जारी केलो.
पुलीस स्टेशन वा विभागाच्या मुखेल्यांनी नेमान ड्युटी रोस्टर तपासचो. अशें केल्यार रातच्या वेळार ड्युटी करपी, गार्ड ड्युटी अश्या कश्टी आनी थकपा सारकें काम करपी कर्मचार्यांचेर अन्याय जावचो ना अशेंय ह्या आदेशपत्रांत अधीक्षक अल्बुकर्क हांणी म्हणलां.
प्रामाणिकपणान आनी ओगी रावून काम करपी पुलीस कर्मचार्यांक कांय ड्युटी मास्तरांक लागून ताण सोंसचो पडटा. तांकांच कठीण कामां दितात. कांय पुलीस ड्युटी मास्तरांक लागीं धरून फकत सय मारपा पुरतें काम करतात आनी पुराय दीस गायब आसतात. ह्या सगळ्यां मदीं प्रामाणीक पुलिसांचो घुस्मट जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
