भांगरभूंय | प्रतिनिधी
सभाघर समिती कडल्यान म्हामंडळांक शिटकावणी
10 म्हामंडळां/स्वायत्त संस्थांचे लेखा अहवाल प्रलंबीत
पणजी : म्हायती तंत्रज्ञान म्हामंडळ, फलोत्पादन म्हामंडळ हें सारकीं म्हामंडळां तशेंच स्वायत्त संस्थांनी फाटलीं खूबशीं वर्सां वर्सुकी लेखा अहवाल सादर करूंंक ना. हाची गंभीर दखल घेवन सभाघर समितीन एका म्हयन्यांत वर्सुकी लेखा अहवाल सादर करपाची शिटकावणी दिल्या. संबंदीत खात्याचे मुखेली तशेंच सचिवांनी हे विशींचे खर आदेश जारी करचे अशें सभाघर समितीन स्पश्ट केलां.
भौशीक वाठार (पीएसयू) सभाघर समितीचे बसकेंत वर्सुकी लेखा अहवालाचेर चर्चा जाली. सरकारी म्हामंडळां तशेंच स्वायत्त संस्थांक वर्सुकी अहवाल सादर करप बंधनकारक आसता. हो अहवाल सादर करपाक म्हामंडळां तशेंच स्वायत्त संस्थां कडल्यान आडनदर जाता, अशें एकंदरीत स्थिती पळयले उपरांत लक्षांत येता. गोंय म्हायती तंत्रज्ञान उदरगत म्हामंडळा कडल्यान 15 वर्सांचे लेखा अहवाल सादर करूंक ना. 2006-2007 ते 2020 मेरेनचे लेखा अहवाल म्हायती तंत्रज्ञान म्हामंडळान सादर करूंक ना. तशेच गोंय राज्य अनुसुचीत जाती आनी हेर मागास वर्गीय अर्थीक उदरगत म्हामंडळान 11 वर्सां लेखा अहवाल सादर करूंक ना. 2010-11 ते 2020-21 मेरेनचे लेखा अहवाल मागास वर्गीय अर्थीक उदरगत म्हामंडळान सादर करूंक ना. ते भायर गोंय हस्त कारागिरी उदरगत म्हामंडळ, फलोत्पादन म्हामंडळ, पणजी स्मार्ट सीटी, वीज खातें हांचे लेखा अहवाल प्रलंबीत आसात.
10 म्हामंडळां आनी स्वायत्त संस्थांचे वट्ट 53 अहवाल खूबशीं वर्सां प्रलंबीत आसात. कदंब म्हामंडळ, गोंय साधन सुविधा म्हामंडळ, ईडीसी, गोवा इलेक्ट्रॉनिक्स, पर्यटन उदरगत म्हामंडळ, गोंय मास प्रकल्प, उद्देगीक म्हामंडळ हांणी मात वर्सुकी लेखा अहवाल सादर केल्यात. ह्या संस्थांचे अहवाल प्रलंबीत नात.
बॉक्स
म्हामंडळ/स्वायत्त संस्था प्रलंबीत आशिल्ल्या अहवालाचें वर्स अहवालांचो आंकडो
इन्फोटेक म्हामंडळ 2014-15 ते 2020-21 7
रानां उदरगत म्हामंडळ 2017-18 ते 2020-21 4
हस्तकारागिरी म्हामंडळ 2020-21 1
फलोत्पादन म्हामंडळ 2017-18 ते 2020-21 4
अनुसुचीत जाती अर्थीक म्हामंडळ 2010-11 ते 2020-21 11
पणजी स्मार्ट सीटी लिमिटेड 2017-18 ते 2020-21 4
गोंय म्हायती तंत्रज्ञान म्हामंडळ 2006-07 ते 2020-21 15
गोंय वीज खातें 2020-21 1
खादी विलेज 2020-21 1
सीएएमपीए 2016-17 ते 2020-21 5
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
