भांगरभूंय | प्रतिनिधी
म्हापशें: देशाच्या स्वातंत्र्य दिसाच्या अमृत महोत्सवा निमतान म्हापश्यां भाजप मंडळा वतीन विवीध कार्यावळींचें आयोजन केलां. हो महोत्सव पक्षाचे पलतडी वचून मनयतात. सगल्या लाेकांनी हातूंत वांटो घेवचो अशें आवाहन उपसभापती ज्योशुआ डिसोझा हांणी केलें.
काल (बिरेस्तारा) आपल्या घरा कडेन आयोजीत केल्ले पत्रकार परिशदेंत ते उलयताले. ह्या वेळार म्हापशें भाजपा मंडळाचे अध्यक्ष सुशांत हरमलकार, सरचिटणीस यशवंत गवंडळकार, महिला मंडळाध्यक्ष रोशन नायक, युवा मोर्चाध्यक्ष तन्वेश केणी, नगराध्यक्षा शुभांगी वायंगणकार, उपनगराध्यक्ष चंद्रशेखर बेनकार, नगरसेविका बार्बरा कारास्को, प्रिया मिशाळ, नगरसेवक विराज फडके, आशिर्वाद खोर्जुंवेंकर, साईनाथ राऊळ आनी स्वप्नील शिरोडकार हाजीर आशिल्ले.
अमृत महोत्सवाचें औचित्य सादून केंद्र सरकारान आझादी का अमृत महोत्सव मनोवपाचो निर्णय घेतला. ते खातीर म्हापश्यां फाल्यां (शुक्रारा) भाजपा युवा मोर्चा वतीन सांजवेळा करासवाडो जंक्शन ते म्हापशें तार पुला मेरेन दुचाकी फेरीचें आयोजन केलां. 13वेर दनपारां 12 वरांचेर मंडळा वतीन पक्षाच्या उत्तर गोंय कचेरे मुखार ध्वजारोहन करतले.
राजकी मतभेद कुशीक दवरून दरेकांनी आपल्या घरांचेर देशाचो तिरंगो हुबोवचो आनी हर घर तिरंगा ह्या उपक्रमांत वांटेकार जावचें अशें आवाहनूय डिसोझा हांणी केलें.
नगरसेविका डॉ. नूतन बिचोलकार हांणी पक्षांत प्रवेश करतना कसलीच मागणी केल्ली ना. पक्षान तांकां कसलेंच आस्वासन दिल्लें ना. त्यो आयिल्ल्यान पक्षाक आनीक घटाय मेळ्ळ्या. पालिका मंडळांतली आमची संख्या वाडल्या. पालिकेचेर पालिका मंडळ स्थापीत जाले उपरांत दरेक वर्सा नगराध्यक्ष आनी उपनगराध्यक्ष बदलतले अशें थारिल्लें. पूण हाचे निमाणो निर्णय जाल्लो ना अशें डिसोझा हांणी म्हणलें.
उपसभापतीपद मेळिल्ल्यान आतां हांव म्हापशें मतदारसंघ तशेंच पालिकेच्या प्रशासकी कारभारा कडेन वेवस्थीत लक्ष दिवंक शकता. पालिकेंत कांय पदां रितीं आसून ती पंचायत निकाला उपरांत भरतले. तशेंच 15 ऑगस्टा उपरांत नवो अणभवी मुख्याधिकारी पालिकेक मेळटलो. येता त्या कांय दिसांनी पालिकेच्या ग्रंथालयाचें काम हातांत घेतले अशें उपसभापती ज्योशुआ डिसोझा हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
