भांगरभूंय | प्रतिनिधी
सैन्याक राजाचे कडक आदेश आशिल्ले. बायलांक झुजाक हाडूंक फावनात, झुजांत तांकां धरूंक फावना. बायलां आड गुन्यांव माफ जायनाशिल्लो.
गोविंदबाब गावडे,
गांव उदरगत मंत्री
नमस्कार,
लोकोत्सवाच्या उपरांत स्वयंपूर्णा सारस 2025 जैताकडेन व्हरता म्हणून परबीं. स्वयंपूर्णेक निरोपा आदीं 2025 -2026 अर्थिक वर्सा सावन प्लास्टीक मेकळें जावपाची मेसेज धाडात. अस्तुरी आयोगाच्यो आदल्यो अध्यक्ष विद्याताई गावडे हांकां सांगून प्लास्टीक मुक्तीची वाट स्वयंपूर्णेक दाखयात. याद आसा न्हय, आदले मुख्यमंत्री मनोहरबाब पर्रीकार हांणी पणजे महालक्ष्मी वाचनमंदीर सुवाळ्यांत तुमची तोखणाय कशी केल्ली ती भाशणा खातीर?
कितलीं रुपां दिसतात गांवगिरे अस्तुरेचीं, स्वयंपूर्णेतल्यान. ती फुडें वचत आसा, मोबायलांत घुस्पल्या, चुडीदारय घालता. फकत आई, ताई, माई, आकाच न्हय स्वयंपूर्णेत गुजरात ते केरळ मेरेनची दीदी, अम्मा, अन्नपूर्णाय आयल्या. इडलेचें पीठ आनी कांजीवरम साड्यो घेवन. पावस लागीं आयिल्ल्यान पापड, सांडगे, लोणचें, अळसांदे, मसाल्यांक मागणी चड. मातयेच्यो माळट्यो, कायली, मगस, लोखणाचे तवे, कायली, वेताच्या सुपांक, दालयांक, हातऱ्यांक मांदऱ्यांक गिरायक तोखेता. ओरिसाची सानुली पर्स, राजस्थानी गोधडी, एक ग्राम भांगरांतलीं मोतयां, पोवळीं, गोवन आवाळ्याची सुपारी, बिमलां, आवाळ्याचीं लोणचीं गिरायकांक आपोवन व्हरता.
मुख्यमंत्र्यांचे स्वयंपूर्णेक कला अकादमीच्या मेकळ्या आंगणांतल्या माटवांत माची तुमी दिलीच, तिचे बराबरीन ताका पळोवन खोस तुमकांय जाल्या आसतली. दनपार सावन रोसांतल्यो शेवयो, कड्डणाची, जोंधळ्याची भाकरी, कांद्याचीं भजीं, उसाचो रोस, मोजिटोच्या सरबतांक, चिकन काफ्रियाल, व्हेज बिर्याणी, तरेकवार लाडू, कापांय गिरायक विकतें घेता. गोविंदबाब, तुमकां खबर आसा कुंकळ्ळेच्या पोपटाच्या पाटांची दारां इफ्फीच्या मोराकय फाटीं घालपा सारकीं जाल्यात? लाटफळ्यां परस लाकडी सानुले देव्हारे, आदोळेचीं आधुनिक रुपां स्वयंपूर्णेत हाडप सोंपें न्हय. गांवची उदरगत अशीच करीत रावात, कला अकादमीच्या मेकळ्या आंगणातलो एक कोनसो स्वयंपूर्णेक दिवचोच पडटलो. मोडिल्ली कला अकादमी चाफ्याच्या, दसणीच्या, आंब्याच्या झाडांनी तुमी पांचवीताल्ल दवरल्या, स्वयंपूर्णा, सेरेंडीपीटी, लोकोत्सव, गायन, नाचाचें उत्सव कला अकादमीक संजीवनी दितात.
विरोधी पक्ष मुखेली युरी आलेमांव स्वयंपूर्णेची लावणी पळोवंक आयिल्ले व्हय? दर्यासंगम, दयानंद बांदोडकर ग्रावंडार तुमकां आनीक झाडां लावचींच पडटलीं, धुल्लांतल्यान ग्रावंडाक भायर काडचो पडटलो साग ग्रावंडावरीं. तजवीज मात्शी जावंदी 2025 – 2026 च्या अर्थसंकल्पांत. उजवाड दिवपी लायटी पणजेंत आसात, लिकलिकपी दिवे ना लावप बरे. परतून एकदां याद करुन दितां स्वयंपूर्णेक प्लास्टीक मेकळी करपाची, ते खातीर केंद्र सरकारा कडल्यान अर्थीक बळगें मेळटा. जय हो, नितळ गोंय, सबळ स्वयंपूर्णा.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
