भांगरभूंय | प्रतिनिधी
गोंयांत खूबशा लोकांक अपघातांनी मरण आयलां आनी येत आसा. गोंयचे रस्ते पेड्ड्यार आसात हेंवूय तितलेंच खरें. पूण लोकूय नेमांक पाळो खंय दितात? बेफिकिरीन कशाय कश्यो मोटारी, दुचाकी चलोवन अपघाताक आमंत्रण दितात आनी स्वताचो तशेंच दुसऱ्याचोय जीव घाताक घालतात. पुलीस रस्त्यार लोकांनी हॅल्मॅट घालचें, सीट बेल्ट घालचो, नेम पाळचे म्हूण आडावन तालांव दितात. पूण लोकांक खंय पडून आसा हाचें? तालांव पडटलो म्हूण लोक कशे पद्दतीन आपणालो आनी दुसर्यांचो जीव घाताक घालून पळटात तें आमी पळयलांच आसतलें.
पुलीस रस्त्यार जाग्याजाग्यांनी रावून हॅल्मॅट घालूंक ना सीट बेल्ट घालूंक ना म्हूण आडायतात. अशें आसून लेगीत तालांव पडटलो ह्या भंयान तरणाटे कशे चुकीचे पद्दतीन दुचाकी वळोवन पळ काडटात हें सदांच दिसता. हें कितले मेरेन योग्य आसा. आमी कोणाक फटयतात. अशे लोक लेनीत गाडयो फूल स्पिडीन व्हरून जर अपघात जालो जाल्यार लोक पुलिसांक दोशी धरतले. पुलीस आपलें काम करतात, पूण उरफाटे लोक पुलिसांक गाळी संवतात. कांय पुलिसांक लागून पुराय पुलीस खातें बदनाम जालां. पूण सगलेच पुलीस तशे नासतात हें कितलेशेंच फावटीं सिद्ध जालां.
तालांव पडटलो ह्या भंयान पळ काडपी आपलो जीव घाताक घालताच पूण अपघात जायत जाल्यार दुसर्याकूय फोंडांत घालतात. पुलीस गरजे भायर कोणाकूय तालांव दिनात. तुमी सारके कायद्यान नासतात म्हूण पुलीस तालांव दितात. पूण लोकांक अजून सजमून येना. आतां मेरेन आमचे कितले भाव अपघातांत बळी थारल्यात आनी चडशे अपघात हे रस्त्या वेले नेम पाळूंक नाशिल्ल्यान जाल्यात अशें डेटा सांगता.
आमी जर देड-दोन लाख रुपया मोडून दुचाकी घेवंक शकतात जाल्यार देड हजाराचें हॅल्मॅट घेवंक शकनात? हो एक व्हडलो प्रस्न. हॅल्मॅट घाल्यार तुमचोच फायदो. कांय भुरगीं घरच्या लोकांक दाखोवपा खातीर हॅल्मॅट तकलेक घालून भायर सरतात. पूण घरा कडल्यान कांय मिटर वतकूच हॅल्मॅट काडून आपल्या हाताक वा दुचाकीक लायतात. कांय जाणांचें हॅल्मॅट जाल्यार दुचाकीचे डिकींत आसता, पूण तकलेक केन्नाच घालिनात. पुलिसांनी आडायले उपरांत हॅल्मॅट डिकींत आसा अशी जाप मेळटा. आनी उपरांत पुलीस ताका तें हॅल्मॅट डिकींतल्यान काडून तकलेक घालूंक लायतात हें तुमी आमी सगल्यांनी पळयलांच आसतलें.
आमी केन्ना शाणीं जातलीं. काय अशींच पिशेंपणां करून जिवा कडेन खेळटलीं. अपघात जालो तकली फुटली वा मरण आयलें जाल्यार पुलिसांचें कांयच वचना. वता तो तुमचो जीव. वा हात-पांय मोडून बसचें पडटा घरांत. तुमचे फाटल्यान कुटुंबाक कितले त्रास. तुमचे फाटल्यान आवय-बापायचें कितें जातलें हें चिंतप तितलेंच म्हत्वाचें. जल्माक आयलो तो केन्ना तरी मरतलोच. पूण आपल्या हातान आपलें जिवीत सोंपोवप हें समा व्हय? ‘जीव आसल्यार भीक मागून खावं’ ही आदली जाण्टेल्यांची म्हण आसा. ते खातीर मोगाळ गोंयकारां कडेन मागतां रस्त्या वेले नेम पाळात आनी स्वताचो जीव सांबाळात.
फाटल्या णव म्हयन्यांत गोंयच्या रस्त्यांचेर 1,824 अपघात जाले. फाटल्या स म्हयन्याचो डेटा घेत जाल्यार फक्त स म्हयन्यांत मरण आयिल्ल्यांचो आंकडो 197 आसा. तातूंत हे उरिल्ले तीन म्हयने धरीत जाल्यार मरप्यांचो आंकडो अडेचशें मेरेन पावला आसुये. गेल्लो मनीस परतून मेळना. रस्ते पिड्ड्यार म्हूण सरकाराक बोट दाखयलें आनी काम सोंपलें अशें जायना. दर एकल्यान आपल्या जिवाची काळजी घेवची पडटली. निदान आपल्या घरच्यांचें तरी चिंतून. हाता-पांयार खेळयिल्ल्या भुरग्याचो जीव गेल्लो पळोवन खंयच्या आवय-बापायक बरें दिसतलें?
सिमी गांवकार
9158544966
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.