स्वताची अस्मिताय

भांगरभूंय | प्रतिनिधी

आमचे भितरलो बदल आमकां जिणेंत समाधान दितलो. विचार करपाची आनी जियेवपाची पद्दत बदलल्यार सगळें बदलता. दुसऱ्यांची नदर बदलूंक मेळना.. स्वता बदलप सोंपें.

आयच्या वेगान चलपी जिणेंत लोक आपले इत्से प्रमाण बदलत रावतात. जेन्ना गजाली आपल्या इत्से प्रमाण जायनात, तेन्ना ते दुसऱ्यांक दोश दितात. आमी स्वता कडल्यान बदल सुरू करपाक जाय. आमी स्वताक बदलूंक शकतले जाल्यार मागीर आमी हो संवसार बदलूंक शकतले. खंयचोच मनीस परिपूर्ण ना, खात्रीन तातूंत कांय दोश आसतात. तशेंच मनशांत जावपी रुपांतराचीय आमकां पुराय जाणविकाय आसा.

उणाव वळखप, ते मान्य करप आनी ताचेर मात करप हें एक सामकें कठीण काम. दोश आमचे भितर लिपल्यात, पूण ते आमकां दिसनात आनी ताचे खातीर आमी दुसऱ्यांक दोश दितात. दुसऱ्यांक सांगचे परस आपलीं उणीं वळखून तीं बदलपाचो यत्न करप बरें.

जिणेंतली परिस्थिती सारकी ना. काळा प्रमाण ती बदलता. परिस्थितींतलो हो बदल सैमीक. केन्ना परिस्थिती आमकां बदलपाक बाध्य करता आनी केन्ना परिस्थिती प्रमाण आमी स्वताक बदलतात. स्वतांत बदल करपाक तुमी तुमचीं उणीं वळखुपाक जाय आनी स्वताचेर पुराय विस्वास दवरपाक जाय. जेन्ना आमी आमचीं उणीं वळखतात आनी स्वताचेर काम करतात तेन्ना आमचो भंय आनी चिंतेंतल्यान सुटका जाता. 

आमचो भितरलो विस्वास आनी विस्वासच आमचें मन बदलता आनी आपोआप आमची वास्तवताय बदलता. केन्ना केन्ना परिस्थिती आमच्यांत नकारात्मकताय निर्माण करता. हे नकारात्मक विचार आमच्या विचारांत बदल करतात. गजाली स्वता केन्नाच बदलनात, त्यो बदलपाची गरज आसा. आमच्या चुकांक आमी चड करून दुसऱ्यांच्यो चुको म्हणटात आनी होच आमचो नकारात्मक विचार. ही वृत्ती बदलून सकारात्मक विचारांनी मुखार वचपाची गरज आसा. जेन्ना आमी आमचे विचार बदलतले तेन्नाच आमकां आमचे भोंवतणी आनी समाजांत सकारात्मक गजाली दिसतल्यो आनी ताका खरो बदल म्हणटात. सकारात्मक भावना आनी आमचो आत्मविस्वास ही आमची स्वताची अस्मिताय. आमचीं उणीं पयस करून आमी नवे सकारात्मक विचार हाडूंक शकतात. दुसऱ्यांक दोश दिवचे परस स्वताचे विचार बदलून स्वताची अस्मिताय तयार करप बरे.

चड करून जिणेंत कितें तरी घडटा आनी ताचो परिणाम आमच्या विचारांचेर जाता. हो विचार आमचे भितर एक बदल निर्माण करता आनी हो बदल सकारात्मक वा नकारात्मक विचारांच्या रुपांत आसूं येता.पयलीं आमी स्वता बदलपाची गरज आसा. विचार आनी वृत्ती आपोआप बदलतात. दुसऱ्याच्या उणावाक दोश दिवन, तो सोदून वेळ फुकट घालोवचे परस वेळाचो उपेग करून स्वताक बदलपाक आनी सुदारपाक जाय. आमचे भितरलो बदल आमकां जिणेंत समाधान दितलो. विचार करपाची आनी जियेवपाची पद्दत बदलल्यार सगळें बदलता. दुसऱ्यांची नदर बदलूंक मेळना.. स्वता बदलप सोंपें.

भोंवतणी रावपी लोकांची स्वताची वेगवेगळी विचारसरणी आसता. तांची विचारसरणी आमचे परस वेगळी. लोक आपले विचार, गिन्यान, भावना, मुल्यां, अणभव आदी सामकेच वेगळे आसतात. तांच्या दोशां परस तांच्या बऱ्या गुणांचेर आमी लक्ष केंद्रीत करपाक जाय. हेरां कडल्यान मेळिल्ली ही ल्हानशी गजाल जिणेंत व्हड बदल घडोवन हाडूंक शकता. आनी तांचें बरेंपण पळोवन आमचे विचार चड सकारात्मक जातात.

जिणेंतल्या वेगवेगळ्या परिस्थितींत आदार दिल्ल्या लोकां खातीर काळजा थावन उपकार मानपाक जाय. आमच्या जिवितांत हाका म्हत्व दिवप गरजेचें, जिणे कडेन दरेकल्याची पद्दत वेगळी आसता. तांच्या नदरेक तुळा करिनासतना तांकां आपूण आसात तशे मान्य करप बरे. आमच्या विचारांतल्यान आमी आमची वागणूक, शब्दसंग्रह, वागणूक आदी बदलूंक शकतात. ह्या सगळ्या गजालींनी मानसिकताय बदलूं येता आनी जिवीत सोंपें करूं येता.

गौरी भालचंद्र