‘स्वच्छता ही सेवा’ मोहिमेक उपाट प्रतिसाद

भांगरभूंय | प्रतिनिधी

मुख्यमंत्री, आमदार, सरकारी खाती, शिक्षण संस्थांनी घेतलो वाटो

पणजी, प्रतिनिधी : प्रधानमंत्री नरेंद्र मोदी हांच्या आवाहनाक प्रतिसाद दितना राज्यातल्यो शिक्षण संस्था, सरकारी खातीं, न्यायालयां, पालिका आनी पंचायतीनी आयज स्वच्छता ही सेवा मोहिमेत वांटो घेतलो. अक्षरशा हजारांनी लोकांनी वांटो घेतिल्ल्यान ही मोहीम राज्यांत व्हड प्रमाणांत येसस्वी जाली.

साखळी पालिकेच्या नितळसाण मोहिमेचे मुख्यमंत्री डॉ. प्रमोद सावंत हांणी बावटो दाखोवन उक्तावण केलें. शेतकी मंत्री रवी नायक हांणी फोंड्यां, भलायकी मंत्री विश्वजीत राणे हांणी वाळपय, पर्यटन मंत्री रोहन खंवटे हांणी मिरामारा नितळसाण मोहिमेंत वांटो घेतलो. सगळे सत्ताधारी आमदार आपापल्या मतदारसंघातल्या कार्यावळींत वांटेकार जाले. शाळा, महाविद्यालयांतल्या विद्यार्थ्यांनी संस्थेचो वाठार वा मैदाना वेलो कोयर काडलो. राज्यभर सकाळच्या आदेसाक व्हडलो पावस पडलो. मात लोकांची उमेद मात्तूय उणी जावंक ना. ल्हान भुरगीं, बायलो, दादले प्लास्टिकाच्यो व्हडल्यो काळ्यो पोतयो घेवन देवळां, शाळा, बाजार, आपापलीं आस्थापनां नितळ करतना दिसताले. विशेश म्हणल्यार आयताराची सुटी आसतना सगले जाण खास आपापल्या कार्यालयांनी हे विशेश मोहिमेंत वांटेकार जाल्ले.

सरकार कोयराचेर वर्साक 100 कोटींच्या आसपास खर्च करता. कोयर काडलो म्हूण जायना. उदकास्रोत नितळ दवरपाक जाय. हाचे खातीर घरांचे घाणयारे उदक लोकांनी नाल्यात सोडचें न्हय. टाकी बांदची वा सिवरेज जोडणी घेवची. घरांच्या घाणयाऱ्या उदकाक लागून नाले, बांयों प्रदूशित जावपाची भिरांत आसता, अशें मुख्यमंत्री डॉ. प्रमोद सावंत हांणी सांखळे सांगळे. गोंय नितळ दवरपाची जापसालदारी फकत सरकाराची ना, ती लोकांची सुद्धा आसा, अशे तांणी सांगले. संजय स्कूल, एनसीसी, आकाशवाणी, पीआयबी, म्हायती प्रसिद्धी खातें, भलायकी केंद्रांनीय नितळसाण मोहिमेत वांटो घेतलो. कांय खाजगी संस्थांनी ही नितळसाण मोहिम चालीक लायली.