भांगरभूंय | प्रतिनिधी
भाजप मंत्री, फुडारी हांच्या उलोवपाचो फरक पडना: उत्पल
पणजी : स्मार्ट सीटीची जीं कामां पणजेंत सुरू आसात, तीं योग्य दर्जाचीं जावचीं. काम करतना लोकांच्या सुरक्षीततायेचो विचार जावचो, होच उद्देश म्हज्या उलोवपाचो वा आरोपा फाटल्यान आशिल्लो. ताचे फाटल्यान कसलेंच राजकारण वा बदनामीचो हेत नाशिल्लो, अशें उत्पल पर्रीकार हांणी स्पश्ट केलां. भाजपाचे मंत्री, फुडारी वा कार्यकर्ते आतां जे आरोप प्रत्यारोप करतात, ताका लागून म्हाका फरक पडना अशेंय तांणी म्हणलें.
फाटल्या सप्तकांत सर्गेस्त मनोहर पर्रीकार हांचे पूत उत्पल पर्रीकार हांणी पत्रकार पशिद घेवन स्मार्ट सीटीच्या कामांत भ्रश्टाचार जाल्ल्याचो आरोप केल्लो. कंत्राटदाराचेर नियंत्रण नाशिल्ल्यान कामाचो दर्जो समाधानकारक नाशिल्ल्याचे उलोवप तांणी केल्लें. हाचे उपरांत मुख्यमंत्री डॉ. प्रमोद सावंत हांणी बसका घेवन स्मार्ट सीटीच्या कामाचो नियाळ घेतलो. बसके उपरांत मंत्री बाबूश मोंसेरात हांणी पणजेचे स्थितींत आदले आमदार मनोहर पर्रीकार जापसालदार आशिल्ल्याचो आरोप केलो. हाका लागून स्मार्ट सीटी वेल्यान आरोप प्रत्यारोपांचे राजकारण सुरू जालें. पर्रीकार समर्थक बायलांनी बाबूश मोन्सेराताच्या आरोपांचो निशेध केलो. मनोहर पर्रीकार हे म्हान फुडारी आसा. तांचे विशीं जापसालदारकीन उलोवचें अशी समज मुख्यमंत्री डॉ. प्रमोद सावंत हांणी दिली. सर्गेस्त मनोहर पर्रीकार हांच्या समर्थनार्थ आनी विरोधांत सत्ताधारी पक्षा मदींच आरोप प्रत्यारोप जाले.
मनोहर पर्रीकार हांणी जो वावर केला, तो पुराय देशाक खबर आसा. भाजप फुडाऱ्या मदीं जे आरोप प्रत्यारोप सुरू आसात, तातूंत म्हाका कसलोच फरक पडना. स्मार्ट सीटीची कामां बेगीन पुराय जावन पणजेकारांक थाकाय मेळपाक जाय. स्मार्ट सीटीच्या कामांचेर हांवें मुख्यमंत्री डॉ. प्रमोद सावंत हांची भेट मागल्या. सगल्या कामांचेर हांव लक्ष दवरून आसा, अशें उत्पल पर्रीकार हांणी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
