भांगरभूंय | प्रतिनिधी
पणजी, प्रतिनिधी : मळ्यांत स्मार्ट सिटीच्या कामा निमतान हालींच अपघात जावन मरण आयिल्ले सुवातेर जतनाय घेतल्या. हे घडणुकेची चवकशी चालू आसा. चवकशी अहवालांत सुरक्षितताय वाडोवपाच्यो सुचवण्यो आयल्यार आमी त्योय करपाक तयार आसात, अशें ‘स्मार्ट सिटी’चे मुख्य कार्यकारी अधिकारी संजित रॉड्रिग्ज हांणी सांगलें.
स्मार्ट सिटीच्या कामा विशीं कसलेच तरेची जतनाय घेवंक ना, हें आपूण मान्य करिना. सध्या काम सुरू आशिल्ले सुवातेर सुरक्षेचे सगले उपाय केल्यात. हे विशीं आपूण आतां कसलेंच मत उक्तावचो ना. चवकशी पुराय जाले उपरांत खरें कितें तें मुखार येतलें. हे घडणुके विशीं आमकां मानव हक्क आयोगाची नोटीस आयल्या. आमी ताका योग्य ती जाप दितले. ती जाप भौशीक करतले, अशें रॉड्रिग्ज हांणी म्हणलां.
रायबंदरा एका कामगाराक मरण आयिल्लें. ती घडणूक कामा विशीं आशिल्ली. मळ्यांतलो अपघात जनतेचे सुरक्षितताये विशीं आशिल्लो. रायबंदर आनी मळ्यांतल्यो घडणुको एकूच न्हय. स्मार्ट सिटीचीं कामां मुदतींत पुराय करपाचो आमचो यत्न आसा. हाचे खातीर आमी सध्या नियोजन करून कामाचो वेग वाडयला अशें तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
