स्मार्ट सिटीच्या ३५ प्रकल्पां मदले २६ प्रकल्प पुराय: संजित रॉड्रिग्स

भांगरभूंय | प्रतिनिधी

पणजीः फाटल्या कांय काळा सावन सुरू आशिल्ल्या पणजी स्मार्ट सिटीच्या ३५ प्रकल्पां मदले २६ प्रकल्प पुराय जाल्यात. हेर ९ प्रकल्प आनी रस्त्यांचीं मुखेल कामां येवपी ३१ मार्च मेरेन पुराय जातलीं अशी म्हायती पणजी स्मार्ट सिटी विकास लिमिटेडचे (आयपीएससीडीएल) मुखेल कार्यकारी अधिकारी संजित रॉड्रिग्स हांणी दिली. लँडस्केपिंग, पेव्हमेंट, रंगकाम ह्या कामां खातीर ३० जून मेरेनचो वेळ लागपाक शकता अशेंय तांणी सांगलें.
पणजेच्या स्मार्ट सिटीच्या कामांक लागून शारांतले येरादारीचेर बरोच ताण पडटा. हाका लागून शारांत वाहन चालकांक सेगीत येरादारी कोयंडीक तोंड दिवचें पडटा. शारांतल्या भितरल्या रस्त्यांचेर सुरू आशिल्ल्या खणपाच्या कामाक लागून तातूंत भर पडल्या. हाका लागून बेगोबेग हीं कामां पुराय जावचीं अशी अपेक्षा नागरीक करतात.
स्मार्ट सिटीचीं कामां पुराय जाले उपरांत मुख्यमंत्री डॉ.प्रमोद सावंत ह्या पुराय जाल्ल्या कामांचो आढावो घेतले. पुराय जाल्ल्या प्रकल्पांचें हस्तांतरण आनी देखभाल हे विशीं बेगीनूच धोरण थारायतले. देखभाली विशीं आजूनय स्पश्ट जावंक नाशिल्ल्यान कांय प्रकल्पांचें हस्तांतरण थांबयिल्ल्याचेंय रॉड्रिग्ज हांणी सांगलें.