भांगरभूंय | प्रतिनिधी
बाबूश मोंसेरात हांणी पत्रकारांक दिली म्हायती
पणजी: स्मार्ट सिटीचे ल्हान प्रकल्प पुर्णत्वाक आयल्यात. व्हड प्रकल्पांचें काम फुडल्या म्हयन्या सावन सुरू जातलें. त्या कामांची प्रगती लेगीत फुडल्या म्हयन्या सावन दिसतली अशी म्हायती पणजीचे आमदार आनी मंत्री बाबूश मोंसेरात हांणी दिली. पणजी म्हापालिकेंत स्मार्ट सिटी विशीं विवीध विभागांच्या अधिकाऱ्यां सयत आयोजीत केल्ले बसके उपरांत ते पत्रकारां कडेन उलयताले.
स्मार्ट सिटीचें काम हें खंयच्या एका विभागाचें नासून सगल्या विभागाच्या समन्वयान हें काम बरें तरेन जातलें अशें तांणी म्हणलें. ह्या वेळार तांणी विवीध विशयांच्या प्रस्नांचेर जापो दिल्यो.
भौशीक बांदकाम विभागान जेट पॅचर मशिनान 2 म्हयन्यांत चडशीं फोंडकुलां पुरयल्यांत. स्मार्ट सिटीचे रस्ते पुराय पणजी वाठारांत जावचे नात ते एक-दोन सुवातींनी जातले. हेर सुवातींनी दुसरे प्रकल्प राबयतले अशें मोंसेरात हांणी म्हणलें.
रायबंदर-पाटो पुला विशीं उलोवपाक तांणी न्हयकार दिलो. 30 सप्टेंबराक हे संबंदी जावपी बसकेंत ताचेर चर्चा जातली अशें तांणी म्हणलें. कांपाल फुटबॉल मैदानाचें काम फुडल्या वर्सा पुराय जातलें. तशेंच रायबंदर हॉस्पिटलाच्या तळमाळ्याचें काम पुराय जालां आनी तो आयुष खातीर वापरतले. पयल्या माळ्याचें काम जाले उपरांत भलायकी विभागा खातीर ताचो वापर जातलो अशें तांणी म्हणलें.
पणजी म्हापालिकेच्या इमारतीच्या नुतनीकरणाचें कामूय रोखडेंच सुरू जातलें. पालिका पोरणें उच्च न्यायालय वा पोरणें सचिवालय हांगा हालोवपाचें नियोजन आसा. हे विशीं मुख्यमंत्री डॉ. प्रमोद सावंत हांचे कडेन चर्चा करून सुवात थारायतले अशें बाबूश मोंसेरात हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
