भांगरभूंय | प्रतिनिधी
गोंयच्या स्मार्ट राजपाटणांतले कला अकादमींत गॅदरिंगां, लोकोत्सव, इफ्फी वेळार गोंयकार, भारतीय चोंब्यांनी येतात. तेन्ना कला अकादमीक आशिल्लीं दारांय उणीं दिसूंक लागतात. सेरेंडीपीटी उत्सवा वेळार उक्त्या ल्हान थेटरांचें प्लॅनिंग कशें आसचें तें 2024 वर्सा नकाशांनी पळोवपाची संद मेळ्ळी कला अकादमींत. कला अकादमींतल्या कॅन्टिनाच्या लागसारचे मेकळे सुवातेंत लोककलेची तोखणाय करपाक जाण्टे, तरणाटे आयिल्ले. तेच संख्येन गोंयच्या तरणाट्यांक नाटकांक येवपाक वेळ मेळटा व्हय? वेगीं बदलपी हवामानाचो अभ्यास केल्यार कला अकादमींत नाटकां, तियात्रां 15 एप्रील मेरेन जावचीं. एप्रील, मे म्हयन्यांत कला अकादमीतलो मेकळो वाठार फेस्तां पासत उपेगाक हाडचो.
मनरिजवण आतां मोबायलार मेळटा, नव्या ल्हारांच्या तंत्रज्ञानाच्या आदारान. तें मतींत घेवन नवे स्मार्ट कला अकादमीची बुन्याद घालचे आदीं वेगीं बदलपी मनरिजवणेच्या नव्या तंत्रांच्या अभ्यासाक इंजिनियर, जाणकारांची समिती करची. जांणी कलेच्या वावराक, शिक्षणाक आपली जीण ओंपली तांकां, संविधान बदलांक कल्पनेंतले काणयेंत गुथपी इंजिनियर, कलाकार, दिग्दर्शक आदित्य जांभळे, ल्हानशा कॅफे प्रकाशाक फिल्मांत हाडपी सुयश कामत हांचे वरी कलाकारांक विस्वासांत घेवप समा जातलें.
कलेच्या अभ्यासाचीं कला केंद्रांय आतां गोंयभर शिंपडल्यांत, कलेच्या शिक्षणाक भुकेल्ले गोंयकार गोंया भायर वचून शिकले, व्हड जाले. पंडित कमलाकर नायक, गायन शिक्षक गुरुदास शिरगांवकार, दामोदर शेवडे हांचे वरी शिक्षक मेळप शक्य जावचें ना, पूण तांचे शिश्य आसात. गोंयांतच न्हय देशांतय विखुरील्ले. तांचो समितींत आस्पाव करचो. नोकरी सांबाळून नाटकां करपी कलाकार शेंकड्यांनी आसतले. गोंयांक वर्सानवर्सां नाट्य, नाच, गायन, वादनाच्या मळार नामना मेळोवन दिल्ले हजारांनी आसत पूण तांणी फक्त कलेक ओंपून घेतलां? विद्या दुसऱ्यांक दिल्या? पुराय वेळ ते कला अकादमीक दिवंक शकतात? कंत्राटाचेर कमी पगार घेवन?
कमलाकरबाब, गुरुदासबुवा हांणी केन्ना कलेचें राजकारण केलें ना. आपल्या शिश्यांच्या कलेची तांक वळखुपी, जोखपी ते शिक्षक. कमलाकारबाबांचे शिश्य विदेशांतय आसात. तांच्या गायकीचो भोवमान देश पांवड्यार जावपाची गरज आसा. तांकां एकाद्रे कलेचीं नवीं तासां आवडचीं ना. भारतीय कलेच्या नव्या तासांची वळख संवसाराक करून दिवपी गीतकार महेश काळे, शौनक अभिषेकी, ए आर रेहमान, शंकर महादेवन हांच्यो खासा सुचोवण्यो मागोवच्यो. तांच्या सुचोवण्यांतल्यान स्मार्ट गोंय कला अकादमीच्या नकाशांची बांदावळ जावची.
कला आनी संस्कृती खात्यांत वावुरिल्ले अशोक परब आयज मिनेझीस ब्रागांझा संस्थेचो वावरय सांबाळटात. लोकसंपर्क बरो आशिल्ल्या परब हांकां कला अकादमीचे अभ्यास समितीचेर घेवं येत व्हय?
कलेची मळांय गोंयभर कशीं पावलीं? कोणाच्या अर्थीक पालवान तांची बांदावळ जाली? रवींद्र भवनांय जाल्यांत पूण तातूंत भवनां सांबाळपाक ते तांकीचें मनीसबळ आसा? एका तेंपार कलेच्या शिक्षणाची तांक नाशिल्ल्या, कुशळटाय आशिल्ल्या मनीसबळाचेर कला अकादमी, रवींद्र भवनां मुखार गेलीं. आतां गरज आसा खऱ्या अॅकेडेमिशयन्सांची (अभ्यासकांची, तंत्रगिन्यान्यांची). तांचे मजतीन देश-विदेश पांवड्यार गोंयची, भारतीय कला, संस्कृती पावोवपी गोंय कला, साहित्य अकादेमीची येवजण जावची. साहित्यय एक कलाच, ते नदरेंतल्यान साहित्यांतल्या जाणकारांक, ज्ञानपीठकारांक नवे कला अकादमीचे येवजण समितीर घेवचे. मडगांव रवींद्र भवनाचे अध्यक्ष राजेंद्र तालक हांकां नाटक, सिनेमा, गायन तंत्रगिन्यानाची जाणविकाय आसा. नव्यान येवकार दिवपाक ते अनमनचे नात.
कला आनी संस्कृती मंत्री गोविंद गावडे अभियंते. तंत्रगिन्यान तेय जाणात. राजपाटणांत कला अकादमीक नवें रूप, नवे सुवातींत व्हरपाक ते फाटीं सरचे नात अशी आस्त बाळगुया. स्मार्ट सिटींतली कला अकादमी स्मार्ट आसची, सभाघरां भोव, गोंयभर, राजपाटणांतय. कलेन स्मार्ट कितलीं? मेजुया, वळखुया.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
