भांगरभूंय | प्रतिनिधी
स्पेन हो देश युरोपाचे दक्षीण-पश्चिमे वटेन आसा. स्पेन आनी पुर्तुगाल ह्या देशांचे भुंयेक इबेरियन द्विपकल्प अशें म्हणटात. स्पेनाचे पश्चिमेक पुर्तुगाल, दक्षिणेक जिब्राल्टर आनी मोरोक्को, जाल्यार उत्तर-पुर्वेक पिरेनीस पर्वतांची रांक आसा. हो देश आकारान फ्रांसा परस ल्हान आसा. स्पेनांत अध्यक्षीय लोकशाय आसा. राजा फेलिपे सवो हे स्पेनचे राष्ट्रप्रमूख आसात जाल्यार पेद्रो सांचेझ हे प्रधानमंत्री आसात. 1986 वर्सा सावन स्पेन युरोपीय म्हासंघाचो वांगडी आसा. कॅस्टिलियन ही स्पेनांतली मुखेल भाशा. स्पेना भायर हे भाशेक स्पॅनीश अशें म्हणटात. 1605 वर्सा मिगेल डे सर्बांटेस हांणी बरयल्ली ‘डॉन कहोटी’ कादंबरी ही संवसारांतली पयली आधुनीक कादंबरी थारली. 2021 वर्सा, स्पेनान इत्सामरणाक कायदेशीर केलें. इत्सामरण कायदेशीर करपी संवसारांतलो हो सवो देश थारलो.
जुंवे – स्पेनांत सुमार 11 मुखेल जुंवे आसात. अटलांटीक म्हासागरांतले कॅनरी द्विपसमूह, भूमध्य सागरांतले बालेआरीक जुंवे आनी चाफारिने, अल्बोरान, वेलेझ, आलुसेमास, पेरेहील अशे हेर कांय जुंवे स्पेनाच्या अधिकारक्षेत्रांत येतात. इबीजा हो जुंवो पर्यटनाचे नदरेन म्हत्वाचो जुंवो थारला.
प्रादेशीक स्पेन – स्पेनांत 17 स्पॅनीश प्रदेश आसात. ह्या सतराय प्रदेशांची स्वताची विशेश अशी संस्कृताय आनी परंपरा आसा. दक्षिणेंतलो एण्डलुशा हो प्रदेश स्पेनांतलो सगळ्यांत लोकप्रिय वाठार. ह्या वाठारांत मुरीश परंपरेंतल्यान आयिल्लो फ्लॅमॅन्को हो नाच प्रकार अजुनूय मेळटा. 15व्या शेंकड्यांतलो हो नाच रोमानी लोकांनी तयार केल्लो अशें मानतात.
स्पेनांतलीं शारां – माद्रीद (मड्रीड) हें स्पेनचें राजधान शार तशेंच सगळ्यांत व्हडलें शार. स्पेनांतले चडशे लोक शारांनी आनी नगरांनी रावतात. बार्सेलोना हें शार पर्यटकां मदीं खूब फामाद आसा. वस्तूशिल्पकला आनी उद्यानांनी भरिल्लीं हीं शारां. तशेंच 12व्या, 13व्या शेंकड्यांतली कला पळोवंक पर्यटक आनी कला मोगी ह्या शारांक भेट दितात. बार्सेलोना फुटबॉल पंगडाचें प्रशिक्षण केंद्र बार्सेलोना शारांत आसा. बार्सेलोना फुटबॉल खेळगड्यांक मैदानाचेर सराव करतना पळोवंक फुटबॉल प्रेमींची गर्दी आसता. बिल्बाओ हें शार स्पेनचें मुखेल उद्देगीक शार. वालेन्सिया, सेविया, मालागा हीं हेर कांय म्हत्वाचीं शारां.
पर्यटन – स्पेनांत सुमार 47 संवसारीक दायज सुवातो आसात. इतिहासीक शारां, पूल, इमारती, फातरांचेर कोराथिल्ल्यो इतिहासीक सुवातो हांचो तातूंत आसपाव आसा. बार्सेलोनांतल्या ‘पार्क ग्वॅल’ ह्या उद्यानाक भुरगीं तशेंच पर्यटक व्हडा संख्येन भेट दितात. ह्या उद्यानांत सैमीक साधनांचो वापर करून बांदकाम केलां. ‘गावदी हावज म्युजियमा’ खातिरूय हो वाठार फामाद आसा. मनरिजवण, मौज-मस्ती खातीर पर्यटक स्पेनांतल्या इबिजा जुंव्याक भेट दितात. सेंट फर्मीनाच्या उगडासान स्पेनांत वेगवेगळ्यो कार्यावळी आनी महोत्सव जातात. जुलय म्हयन्यांत जावपी ‘पॅम्पलोना बूल रन’ (बैल आनी मनीस हांची सर्त) हो स्पेनांतलो महोत्सव संवसारभर गाजला. कोस्टा ब्रावा हो वाठार दर्यादेग आनी दर्यांतल्या खेळां खातीर फामाद आसा.
खाणां-जेवणां – नुस्तें, मांस, शीत, पेस्ट्री हे स्पेनांतल्या खाणांतले मुखेल घटक. झोंग म्हणल्यार ऑक्टोपस हे स्पॅनीश लोकांचें आवडीचें खाण. गॅसपॅचो (टमाट आनी फुगी मिरसांगेचो सूप), पिस्तो (सालादा वरी), पुल्पो अ ला गालेगियेगा (ऑक्टोपसाचो पदार्थ), पायेला (शीत आनी नुस्तें घालून केल्लें खाण), पतातास ब्रावास (बटाट्याचो पदार्थ) हीं कांय खाणां-जेवणां स्पेनांत लोकप्रिय आसात.
स्नेहा सबनीस
9923633789
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
