स्टॉयनीस वादळान श्रीलंका हुबली

भांगरभूंय | प्रतिनिधी

येजमान ऑस्ट्रेलिया पंगडान संवसारीक टी-20 क्रिकेट सर्तीच्या सुपर 12तले आपले दुसरे मॅचींत श्रीलंका पंगडाक 7 विकेटींनी हारयलो.

श्रीलंकेन दिल्ली 158 धांवड्यांची मोख येजमान पंगडान 16.3 ओव्हरींनी फक्त 3 विकेटी वगडावन मेळयली.

ऑस्ट्रेलियेच्या जैतांत ग्लॅन मॅक्सवेल आनी मार्कस स्टॉयनीस पर्जळ्ळे. मॅक्सवेलान 12 बॉलांनी 23 धांवड्यो करून बाद जाल्या उपरांत स्टयनीसान आक्रमक बॅटींग केली. ताणें चवके आनी सक्यांचो पावस घालो. ताणें फक्त 18 बॉलांनी नाबाद 59 धांवड्यांची खेळी केली. हातूंत चार चवक्यांचो आनी स सक्यांचो आस्पाव आशिल्लो.

ते पयलीं ऑस्ट्रेलियेन टॉस जिखून पयलीं फिल्डींग करपाचो निर्णय घेतलो.कमिन्सान दुसरे ओव्हरींत कुशल मॅंडिसाक बाद करून आपल्या मुखेल्याचो निर्णय योग्य थारायलो. पूण, ते उपरांत ओपनर पथुम निसंका आनी धनंजय डी सिल्वा हांणी भागिदारी करपाक सुरवात केली. दोगांयनी दुसरे विकेटी खातीर 69 धांवड्यांची भागिदारी केली. मजगतीं, डिसिल्वा 26 धांवड्यो करून बाद जालो. ताच्या फाटोफाट 45 बॉलांनी 40 धांवड्यांची खेळी करपी निसंका लेगीत तंबूंत परतलो.

ऑस्ट्रेलियेन 10 ते 17 ह्या ओव्हरी मजगतीं, श्रीलंकेच्या बॅट्समनांक थारावीक अंतरान बाद करीत तांची धांवगती आडायली. ताका लागून श्रीलंकेची अवस्था 17.3 ओव्हरींनी 6 बाद 120 अशी जाल्ली. पूण, उपरांत असलंका आनी करुणारत्ने हांणी सातवे विकेटी खातीर नाबाद 37 धांवड्यांची भागिदारी केली. असलंकान 25 बॉलांनी नाबाद 38 धांवड्यो केल्यो, जाल्यार करुणारत्नेन 7 बॉलांनी 14 धांवड्यो करून ताका बरी साथ दिली.

मोखीचो फाटलाव करपी ऑस्ट्रेलियेक सुरवातीकूच धपको बसलो. ओपनर डॅव्हीड वॉर्नर 11 धांवड्यो करून बाद जालो. अॅरोन फिंच आनी मिशेल मार्श हांचेर जापसालदारकी आशिल्ली. पूण मार्श (18) अपेशी थारलो. श्रीलंकेच्या बॉलरांनी आनी फिल्डरांनी जबरदस्त प्रदर्शन करून येजमानाचेर चेपण हाडलें. पावर प्लेंत ऑस्ट्रेलियेक एकूय चवको मारपाक जमलो ना. हाची भरपाय मॅक्सवेलान 10वे ओव्हरींत केली. वनिंदूचे ते ओव्हरींत दोन चवके आनी एक सको मारून वट्ट 19 केल्यो. 12वे ओव्हरींत लाहिरू कुमाराच्या बॉलाचेर मॅक्सवेलाच्या हाताक दुखापत जाली. तिसरो बॉल मॅक्सवेलाचे मानेक आपटलो आनी बॅट्समन हॅल्मेट काडून जमनीचेर पडलो. मुळावो उपचार घेवन तो परतून उबो रावलो. पूण, ताका चड वगत खेळपट्टीचेर रावपाक जमलें ना. करुणारत्नेच्या बॉलाचेर आशेन बंदारान शिमे लागसार कॅच धरली.

मॅक्सवेल बाद जाल्या उपरांत ऑस्ट्रेलियेचेर चेपण येतलें अशें दिशिल्लें. पूण, मार्कस स्टॉयनीसान 15वे ओव्हरींत वनिंदू आड 19 धांवड्यो काडल्यो. थिक्सानाक लेगीत ताणें सोडूंक ना. ताणें तीन सके मारून 17 बॉलांनी अर्द शेंकडो पुर्ण केलो. ऑस्ट्रेलिये वतीन टी-20तलो हो जलद अर्द शेंकडो थारलो. स्टॉयनीसाच्या रुद्र अवताराक लागून मॅच श्रीलंकेच्या हातांतल्यान निसली. फिंचान एक बाजू सांबाळटना संयमी खेळी केली. स्टॉयनीसान 18 बॉलांनी नाबाद 59 धांवड्यो केल्यो. फिंचान नाबाद 31 धांवड्यांचें योगदान दिलें.