भांगरभूंय | प्रतिनिधी
19,500 कोटींची येवजण मंजूर
नवी दिल्ली : प्रधानमंत्री नरेंद्र मोदी हांचे अध्यक्षते खाला जाल्ले बसकेंत केंद्रीय मंत्रीमंडळान उर्जा मंत्रालयाच्या ‘उच्च कार्यक्षमताय सौर पीव्ही मॉड्यूलां विशींच्या राष्ट्रीय कार्यावळ’ ह्या विशयाचेर उत्पादन संबंदीत प्रोत्साहन येवजण (पीएलआय) चालीक लावपाच्या प्रस्तावाक मान्यताय दिल्या. उच्च तांक आशिल्ल्या सौर पीव्ही मॉड्यूलांत गीगावॅट तांकीचें उत्पादन मेळोवपाच्या हेतान 19,500 कोटी रुपया खर्च करून ही येवजण मंजूर केल्या. उच्च तांकीच्या सौर पीव्ही मॉड्यूलांचेर राष्ट्रीय कार्यावळीचो हेतू भारतांत उच्च कार्यक्षमताय सौर पीव्ही मॉड्यूल तयार करपाक एक पूरक प्रणाली तयार करप आनी ताका लागून अपरंपरागत उर्जा क्षेत्रांत आयाती वयलें अवलंबन उणें करप असो आसा. हाका लागून आत्मनिर्भर भारताचो उपक्रम घटमूट जातलो आनी रोजगार निर्माण जातलो. ही म्हायती केंद्रीय मंत्री अनुराग ठाकूर हांणी दिली.
सौर पीव्ही मॉड्यूल तयार करपी उद्देजकांची निवड पारदर्शक निवड प्रक्रियेंतल्यान जातली. सौर पीव्ही उत्पादन उद्देग स्थापन केल्या उपरांत पांच वर्सां खातीर थळाव्या बाजारांत उच्च क्षमता आशिल्ल्या सौर पीव्ही मॉड्यूलांच्या विक्रीचेर उत्पादन विशींचो उर्बा निधी वितरण करतले.
येवजणेचे लाभ
वर्साक सुमार 65,000 मेगावॅट उत्पादन तांक आशिल्ले पुरायपणान वा अंशतः एकत्रीत सौर पीव्ही मॉड्यूल बसवपाचो अदमास आसा. हे येवजणे वरवीं सुमार 94 हजार कोटी रुपयांची थेट गुंतवणूक येतली. 1,95,000 प्रत्यक्ष नोकऱ्यो आनी 7,80,000 व्यक्तींक अप्रत्यक्ष रोजगार निर्माण करप, 1.37 लाख कोटी आयातीक पर्याय, सौर पीव्ही मॉड्यूलांत उच्च कार्यक्षमताय मेळोवपा खातीर संशोधन आनी विकासाक चालना दिवप.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
