भांगरभूंय | प्रतिनिधी
खबरां संस्था, सातारा : इंटरनेटाचेर आमी तिडकी सरशीं मनांत येता तें घालतात. फाटलो फुडलो विचार करीनासतना संवेदनशील वा दिशाभूल करपी पोस्ट फाॅरवर्ड करतात. पूण, ताचो परिणाम वायटूय जावंक शकता, हें आमी मतींत दवरपाक जाय. पयर आनी काल पुसेसावळी (सातारा) हांगा दोन गटांत हिंसक वाद जालो. निमित्त आशिल्लें म्हापुरशां विशीं सोशल मिडियाचेर घाल्लो बदनामी करपी मजकूर. एका विशिश्ट समुदायाक हे खातीर लक्ष्य केलें. उजो लावप, गुंडे मारप असले प्रकार जाले आनी प्रार्थना थळाचेरुय हल्लो जालो. हातूंत एकल्याक मरण आयलां. तर 14 जखमी जाल्यात. तातूंतलो एकलो गंभीर जखमी जाला. वादग्रस्त पोस्ट घालपी दोगांक पुलिसांनी ताब्यांत घेतल्यात.
पुराय सातारा जिल्ह्यांत तणाव आसा. पुलीस बंदोबस्त दवरला. खबरदारी म्हूण इंटरनेट सेवा बंद केल्या. काल रातीं विशिश्ट समाजाच्या घरां, दुकानां, हातगाडे, गाडयांचेर कांय जाणांनी गुंडे मारले. हिंसक जमावान घरां, दुकानांक उजो लावपाक सुरवात केली. ह्या वेळार 2000 तरणाटे एकठांय जाल्ले.
आक्रमक जमावान प्रार्थना थळांत घुसून भितरल्या तरणाट्यांक मारपेट केली. तातूंत एकलो गंभीर जखमी जालो. पुसेसावळी गांवांतल्या एका मनशान 10 सप्टेंबराक सोशल मिडियाचेर एक आक्षेपार्ह पोस्ट घालो. ताका लागून कायदो आनी सुवेवस्थेचो प्रस्न निर्माण जालो. मागीर रातीं उसरां दंगल जाली. तातूंत दोन घरां आनी दोन दुकानां उज्याचे भकीक पडलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
