भांगरभूंय | प्रतिनिधी
पणजीः प्रधानमंत्री नरेंद्र मोदीन अक्षय उर्जा निर्मितीक चालना दिवपा खातीर पीएम सूर्यघर, सोलर रूफ टॉप अशो वेगवेगळ्यो येवजण्यो सुरू केल्यात आनी ताचो फायदो गोंयाकूय जाता. सोलर रूफ टॉपाक लागून आतां मेरेन गोंयांत 54.2 मेगावॅट वीज जोडल्या. पंचायती पांवड्यार पीएम सूर्यघर येवजणे विशीं जागृताय निर्माण जातली अशी म्हायती मुख्यमंत्री डॉ. प्रमोद सावंत हांणी दिली.
पणजेंतल्या सौर उर्जेक चालना दिवपा खातीर जाल्ले कार्यशाळेच्या उक्तावण सुवाळ्यांत मुख्यमंत्री उलयताले. कार्यशाळेच्या उक्तावण सुवाळ्याक केंद्रीय उर्जा राज्यमंत्री श्रीपाद नायक, खासदार सदानंद शेट तानावडे, आमदार दिगंबर कामत हाजीर आशिल्ले.
राज्याची उण्यांत उणी दिसपट्टी वीज गरज 663.32 मेगावॅट आसा. तातूंतले ५५९ मेगावॅट औष्णिक (थर्मल), 61.68 अक्षय (रीनीवेबल) आनी 41.68 मेगावॅट आण्विक (न्युक्लीयर) हातुंतल्यान येता. गोंयांत सोलर रूफ टॉप वरवीं 54.2 मेगावॅट, ग्राउंड माउंटेड सोलार पसून 1.95 मेगावॅट आनी कोयरांतल्यान १.९४ मेगावॅट वीज तयार जाता. उदका पसून (हायड्रो पावर) फकत 0.05 मेगावॅट वीज तयार जाता. गोंयांत पीएम सूर्याघर येवजणे खाला मुफत बिजली येवजण सुरू केल्या. हे येवजणेचो 986 जाणांक लाव घेतलो आनी 5.72 मेगावॅट वीज तयार जाता. ही येवजण चड लोकां मेरेन पावपा खातीर दरेक पंचायतींत कार्यावळी घडोवन हाडटले. वर्साच्या 365 दिसांतल्यान गोंयांत 280 दीस उजवाड आसता. हाका लागून गोंयांत सौर उर्जा निर्मिती खातीर व्हड वाव आसा. उपकरणांची देखरेख करपा खातीर कंत्राटदारांची वळेरी तयार करतले. देखरेखीची जापसालदारकी धा वर्सां खातीर कंत्राटदारांचेर आसतली. भारत सरकाराच्या अनुदानांतल्यान कंत्राटदारांक पगार दितले, जाका लागून ही येवजण गिरायकां खातीर फुकट आसतली. आतां पंचायत पांवड्यार हे येवजणे विशीं जागृताय निर्माण जातली अशें मुख्यमंत्र्यान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
