भांगरभूंय | प्रतिनिधी
प्रदीप गवंडळकारः सत्तरी मुळाव्या विद्यालयांत मनयली नागपंचम
भांगरभूंय । प्रतिनिधी
वाळपयः सोरोप हो जैवविविधतेंतलो म्हत्वाचो घटक. ताका लागून सोरपांचें रक्षण करप खूब गरजेचें. ना जाल्यार पर्यावरणाचेर ताचे घातक परिणाम जावपाक शकतात. ते खातीर सोरपाक मारपा बदला तांची राखण करात, असो उलो सर्पमित्र प्रदीप गवंडळकार हांणी मारलो.
करंझोळ सत्तरीच्या मुळाव्या विद्यालयांत नागपंचम मनयली. ह्या वेळार गवंडळकार उलयताले. तांणी सोरपां संबंदांत भुरग्यांक खोलायेन म्हायती दिली. तशेंच सोरपां विशीं आशिल्ले गैरसमज पयस करपाचो यत्न तांणी ह्या वेळार केलो. तांणी हाजीर आशिल्ल्या भुरग्यांक सोरपांक कशे तरेन हाताळचे आनी सोरपाचे एकूण रचने विशीं खोलायेन म्हायती दिली.
ह्या वेळार माचयेर विद्यालयाचे शिक्षक महादेव गांवकार, शाळा वेवस्थापन समितीचे अध्यक्ष श्रेया नायक हाजीर आशिल्ली.
सैम आमचो सांगाती. सैमाची राखण करप खूब गरजेचें आसा, अशें श्रेया नायक हांणी ह्या वेळार सांगलें. आरोशी केरकार, अनय गावडे आनी विशाल गावडे ह्या विद्यार्थ्यांनी माचये वयल्या मानेस्तांक फुलां भेटयलीं. श्रेया नायक हांणी येवकार दिलो. महादेव गांवकार हांणी सुत्रसंचालन केलें जाल्यार शाळा वेवस्थापन समितीची आदली अध्यक्ष लक्ष्मी गावडे हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
