सोबीतकायेची खण

भांगरभूंय | प्रतिनिधी

आयज व्हॅलेंटायन दीस. भारतीय सिने पड्ड्या वयली मोगाची देवी म्हणल्यार मधुबालाचें नांव याद जाता. तिचो मोगूय गाजिल्लो. तिचो जल्म नेमको मोगाच्या दिसाच जाल्लो…..

आयज व्हॅलेंटायन दीस. ताका मोगाचो दिसूय म्हणटात. ‘व्हीनस’ ह्या ग्रीक देवाक मोगाचो देव मानतात. मधुबाला ही  ‘व्हीनस ऑफ स्क्रीन’ आशिल्ली. म्हणल्यार भारतीय पड्ड्या वयली मोगाची देवीच! आतां मेरेनच्या सुंदर अभिनेत्रींची वळेरी कोणूय तयार करता तेन्ना तातूंत मधुबालाचें नांव पयल्या क्रमांकाचेर येताच. हिंदी सिनेसृश्टींत तिचो मोग गाजिल्लो. तिचो जल्मूय नेमको मोगाच्या दिसाच जाल्लो.

सोबीतकायेची खण, बॉलिवूडाचो अभिमान, फकत फिल्म मळार न्हय तर भारतांतली सगळ्यांत सोबीत बायल म्हणून जिचें वर्णन करतात, ते मधुबालाचो आयज जल्मदीस.

तिका बॉलिवूडाची मॅरिलीन मन्रो म्हणटाले. आयज तिचो 92 वो वाडदीस. 14 फेब्रुवारी 1933 दिसा दिल्लीच्या पश्तून घराण्यांत तिचो जल्म जालो. मूळ नांव मुमताज बेगम जहां देहलवी. मधुबालाच्या जल्मा उपरांत एका मनशान तिका जिवितांत व्हड नामना मेळटली अशें भविश्य सांगिल्लें, अशें म्हणटात. तिका भरपूर पयशे मेळटले, गिरेस्तकाय मेळटली, पूण तिचें जिवीत खूब दुख्खी आसतलें. हाचेर विस्वास दवरून तिच्या बापायन तिका मुंबय हाडली. 

पिरायेच्या णवव्या वर्सा (1942) मधुबालान ‘बेबी मुमताज’ ह्या नांवान चित्रपटांत अभिनय करपाक सुरवात केली. बाबूराव पटेल आनी डॉ. सुशिलाराणी पटेल हांचो ल्हान मुमताजाचेर खूब मोग आशिल्लो. तांणी तिका मधुबाला नांव दवरलें. 

ल्हान पिरायेचेर फिल्मांत काम करपाक लागिल्ल्यान तिका शाळेंत शिकप शक्य जालें ना. तिका इंग्लीश कळनाशिल्ली, पूण उर्दू भास कळटाली. चित्रपटांत अभिनय करपाक सुरवात केले उपरांत ती इंग्लीश उलोवपाक शिकली. तिचो बापूय खर शिस्तीचो. ताका लागून घडये शूटिंग ते घर, घर ते शूटिंग अशें तिचें विश्व. ती केन्नाच सिनेमाच्या प्रीमियराक हाजीर रावली ना. 1947 वर्सा आयिल्ल्या ‘नीलकमल’ ह्या चित्रपटांत तिणें पयलेच खेपे अभिनेत्री म्हणून काम केलें. तातूंत राज कपूर नायक आशिल्लो.  तिचो आनीक एक चित्रपट ह्या वर्सा प्रदर्शीत जालो. 1948 वर्सा तिचो ‘अमर प्रेम’ हो चित्रपट आयलो. हातूंतय नायक राज कपूर आशिल्लो. उपरांत बॉम्बे टॉकीज कंपनीन ‘महल’ नांवाचो सिनेमा काडलो आनी तो सुपर डुपर हिट जालो. ‘आयेगा आनेवाला’ हें पद खूब गाजलें. लता मंगेशकरूय गाजली. मागीर मात मधुबालान फाटीं पळयलें ना. अशोक कुमार, दिलीप कुमार, देव आनंद ह्या त्या काळांतल्या मुखेल कलाकारां वांगडा तिणें अभिनय केलो.

थोड्याच काळांत ती बॉलिवूडांतली मुखेल अभिनेत्री जाली. तिणें आपले कारकिर्दींत 66 चित्रपटांनी अभिनय केला. बॉलिवूडाचो पयलो सुपरस्टार दिलीप कुमारा कडेन तिचो एकेतर्फी मोग आशिल्लो. ‘मोगले आजम’ सिनेमाच्या शुटींग वेळार तिणें दिलीप कुमारा कडेन लग्न जावपाची इत्सा स्वता जावन उक्तायली, पूण दिलीप कुमारान लग्नाक स्पश्टपणान न्हयकार दिलो. उपरांत गायक किशोर कुमार हांचे कडेन तिचें लग्न जालें. मधुबाला ही किशोर कुमाराची दुसरी बायल. हें लग्न कशें तरी जियेवपाची तडजोड आशिल्ली. किशोर कुमाराक तिच्या दुयेंसा विशीं घडये खबर आसतलें. तांचे एकमेकां कडेन चड पटूंक ना. मधुबालाक काळजाचें दुयेंस आशिल्लें आनी 1950 वर्सा सावन ताचेर उपचार सुरू आशिल्ले. पूण हें तिणें लिपोवन दवरिल्लें. भलायकी इबाडून पसून निर्मात्यांक आनी दिग्दर्शकांक लुकसाण जावचें न्हय म्हणून तिणें सायन केल्ले सगले चित्रपट पुराय केले. ती दुयेंत आसा असो दुबाव पसून हे सिनेमा पळयल्यार येना. 

काळजाच्या दुयेंसां वांगडाच तिका आनीक एक दुयेंस आशिल्लें. तिचे कुडींत सामान्या परस चड रगत तयार जातालें आनी ताका लागून तिच्या नाकांतल्यान आनी तोंडांतल्यान रगत येतालें. इतलीं गंभीर दुयेंसां आसून लेगीत तिणें चित्रपटांत काम चालूच दवरलें.

मोगल- ए- आझम सिनेमांतल्या एका दृश्यांत तिका दोरयांनी बांदून दवरिल्ली, पूण भलायकी बरी नासली तरी तिणें तें सोंसलें. अनारकलीची भुमिका करपाची संद परत केन्नाच मेळची ना अशें तिणें उपरांत सांगिल्लें. ती इतली वेवसायीक आशिल्ली की तिणें आपलें काम व्हड समर्पणान केलें. रेल्वेच्या तिसऱ्या वर्गांत भोंवचें पडलें तरी, जेवण नासलें तरी काम वेळार पुराय करपाचो तिचो आग्रो आशिल्लो. कामा विशींच्या समर्पणाक लागूनच ती एक व्हडली अभिनेत्री जाली. 

संवसारांतल्या नामनेच्या ‘थिएटर आर्ट्स’ ह्या अमेरिकन नेमाळ्यान तिचो संवसारांतली सगळ्यांत व्हडली अभिनेत्री म्हूण भोवमान केलो. तिच्या सोबीतकायेची जादू अशी आशिल्ली की तिका पळोवपी मनीस पळयतूच उरतालो. ‘लायफ’ नेमाळ्यान तिचे खातीर खास फोटो सेशन केल्लें.  पूण ह्याच सोबीतकायेची तिका दिश्ट लागली अशें म्हणून येता. फकत 36 वर्सां पिरायेचेर तिणें हो संवसार सोडलो. 23 फेब्रुवारी 1969 दिसा तिका मरण आयलें. मधुबालाक ‘व्हीनस आॅफ स्क्रीन’ अशें म्हण्टात. तिका मरण आयिल्ल्याक 56 वर्सां पुराय जातलीं. पूण तिची सोबीतकाय आनी अभिनयाची जादू अजूनय जिवी आसा. बॉलीवूडाची सोबीतकायेची खण आशिल्ले मधुबालाक तिच्या जल्मदिसा निमतान अभिवादन.

 श्याम ठाणेदार

 9922546295