सोनाली फोगट: हरियाणांत पुलीस करतात पुराव्यांची खातरजमा

भांगरभूंय | प्रतिनिधी

गोंय पुलिसांचो तपास निश्कर्शा मेरेन पावतलोः जसपाल सिंग

पणजी : अभिनेत्री सोनाली फोगट खून प्रकरणांत पुलीस हरियाणांत पुराव्यांची खातरजमा करतात. गुन्यावांच्या तपासांत गोंय पुलिसांची कामगिरी सरस आसा. सोनाली फोगट खून प्रकरणांत पुलीस तपास एका निश्कर्शा मेरेन पावतलो असो विस्वास पुलिस म्हासंचालक जसपाल सिंग हांणी उक्तायला.

सोनाली फोगट खून प्रकरणांत पुलीस म्हासंचालक जसपाल सिंग हांणी तरेकवार मुद्यांचेर उलाेवप केलें. तपास सीबीआय कडेन दिवचो अशी मागणी सोनालीचे कुटुंब करीत आसात. अजून मेरेन तरी तपास सीबीआय कडेन दिवंक ना. उपअधिक्षक पांवड्यार तपास सुरू आसा अशें हाचे पयलींच मुख्यमंत्री डॉ. प्रमोद सावंत हांंणी स्पश्ट केलां.

तपासा खातीर पुलिसांचो एक पंगड हरियाणांत आसा. फाटल्या बुधवारा हो पंगड हरियाणांत पावला. खून प्रकरणांतलो मुखेल दुबावीत सुधीर सांगवा हाचे फ्लॅट तशेंच हेर मालमत्तेक भेटी दिवन पुरावे तपासपाचो वावर पुलीस करतात. सुधीर सांगवा हांचो रोहतक हांगा फ्लॅट आसा. पुरावे लागीं करपा सयत तांची जुळवाजुळव करपाचो वावर सुरू आसा अशी म्हायती गोपांनी दिली.

सोनाली फोगट खून प्रकरणाचो तपास योग्य तरेन सुरू आसा. तपासात गोंय पुलिसांची कामगिरी उत्कृश्ट आसा. जे तरेन तपास सुरू आसा, तें पळयल्यार तपास ठोस निश्कर्शा मेरेन येतलो असो विस्वास पुलिस म्हासंचालक जसपाल सिंग हांणी उक्तायला.

तपास सीबीआय कडेन दिवचो अशी सोनाली फोगट कुटुंबाची मागणी आसा. तपास सीबीआय कडेन दिवपा विशीं मात पुलिस म्हासंचालकांनी उलोवप करूंक ना.

सोनाली फोगट हिका 23 ऑगस्टाक दुबावीत रितीन मरण आयिल्लें. मरण आयलें उपरांत तिका हॉस्पिटलांत दाखल केल्ली. ह्या प्रकरणांत गोंय पुलिसांनी पयलीं सैमीक रितीन फोगट हिका मरण आयिल्ल्याचे नोंद केल्लें. पूण फोगट हिचो भाव रिंकू ढाका हांणी गोंयांत आयले उपरांत आपले भयणीचो खून जाल्ल्याचो दुबाव उक्तावन चवकशी करपाची मागणी केली. गोमॅकाँत फोगट हिच्या कुडीचो पोस्टमार्टेम जाले उपरांत तिचे कुडीचेर घावे दिसून आयले. तशेंच तिणें उदकांतल्यान ड्रग्स घेतिल्ल्यान मरण अायिल्ल्याचें स्पश्ट जाल्लें. ते उपरांत पुलिसांनी खुनाचो गुन्यांव नोंद करून तपास सुरू केलो. आतां मेरेन पुलिसांनी 5 जाणांक अटक केल्या.

खून प्रकरणांतले मुखेल दुबावीत सुधीर सांगवा आनी सुखविंदर पाल सिंग हांकां पयलींच 10 दिसांचो रिमांड दिला. हाका लागून पांचूय दुबावीत पुलीस कोठयेंत आसात.

सुधीर सांगवा आनी सुख​विंदरपाल सिंग हांची चवकशी सुरू आसा. ह्या खून प्रकरणांत आनीक दुबावीत घुस्पल्ल्याचो दुबाव आशिल्ल्यान पुलिसांनी अदीक तपास सुरू केला. ते खातीर पुलिसांचो एक पंगड हरियाणांत आसा.

खून प्रकरणांतले मुखेल दुबावीत सुधीर सांगवान आनी सुखविंदर पाल सिंग हांकां सगल्यांत पयली अटक जाल्ली. हणजूण हांगासरल्या रामा मांद्रेंकार हाणें घुंवळे वखदां दत्तप्रसाद गांवकार हाका दिली. दत्तप्रसाद गांवकार हाणें ती सुधीर सांगवा हाका विकली, अशी म्हायती उक्ती जाल्या. घुंवळे वखदां पियेवपाक दिवपाचो प्रकार कर्लीस बीच क्लब शॅकांत जालो. कर्लीस बीच क्लब शॅकाचो धनी एडवीन नुनीस हाका लेगीत अटक जाल्ली.

कर्लीस रॅस्टोरंण्टाच्या शौचालयांत 2.2 ग्रॅम मेटाफेटामायन घुंवळे वखद मेळ्ळें उपरांत एडवीन नुनीस हाका पुलिसांनी अटक केल्ली. पेंयांत घुंवळे वखद घालून दिल्ल्यान सोनालीक मरण आयलें. सुधीर सांगवा आनी सुखविंदरपाल सिंग हांणी हें पेय दिलां, असो निश्कर्श आसा. हे दिकेन तपास सुरू आसा. खुना फाटल्यान अर्थीक कारण आसपाचे शक्यतायेन तपास सुरू आसा.