भांगरभूंय | प्रतिनिधी
राजेंद्र आर्लेकारः सत्तरींत पांयभोंवडी मोहिमेचें आयोजन
भांगरभूंय । प्रतिनिधी
वाळपयः आयज सैम वाटोवपाचें व्हड आव्हान दरेका मुखार निर्माण जालां. हे खातीर दरेकल्यान ह्या वावरांत जाता तितलें योगदान दिवचें. सैमाचो सांबाळ करपाचो आसा जाल्यार दरेकल्यान चानयेचो वांटो उखलप गरजेचें आसा, अशें हिमाचल प्रदेशाचे राज्यपाल तशेंच ह्या असोसिएशनाचे अध्यक्ष राजेंद्र आर्लेकार हांणी सांगलें.
ठाणे सत्तरीच्या पंचायत सभाघरांत आयोजीत केल्ले कार्यावळींत राज्यपाल आर्लेकार उलयताले. तांचे वांगडा ऑल इंडिया यूथ हॉस्टेलाच्या गोंय फांट्याचे अध्यक्ष तशेंच आदले आमदार सिद्धार्थ कुंकळकार, सचीव मनोज जोशी, पंचायतीचे प्रशासक अझीझ शाह, सचीव विनायक गांवकार, सचीव सर्वेश गांवकार, पंचायतीचे आदले उपसरपंच गोविंद कोरगांवकार आनी हेर मानेस्त हाजीर आशिल्ले.
सैमाची राखण जावची हे खातीर आपूण गोंय विधानसभेचो सभापती आसलो तेन्ना पेपरलेस विधानसभेचें कामकाजाचेर भर दिल्लो. हाका लागून सुमार 1328 झाडांची राखण जाल्या. गोंयकार सैमा वांगडाच हेरांचेरूय मोग करतात. ताका लागून सैमाचो सांबाळ करपा खातीर गोंयकारांनी आतां मेरेन व्हड योगदान दिलां. यूथ हॉस्टेल असोसिएशन ऑफ इंडिया हांचे वतीन सत्तरी म्हालांत फाटल्या 10 वर्सां सावन नेमान पांयभोंवडी मोहीम आयोजीत करता. हे वरवीं तांणी सत्तरी म्हालांतली सैमीक सुंदरताय संवसारीक पांवड्याचेर व्हरपाचो केल्लो वावर खऱ्यांनीच तोखणायेचो आसा, अशें राज्यपाल आर्लेकार हांणी सांगलें.
हिमाचल प्रदेशांत सुमार 4 कोटी रुपया खर्च करून कायमस्वरुपी पांयभोंवडी केंद्रां विकसीत करतले. हे संबंदांतले कागदपत्रांचें सोपस्कार सुरू जाल्यात. फुडारांत हिमाचल प्रदेशांत व्हड प्रमाणांत पांयभोंवडी मोहीम आयोजीत करून त्या वाठारांतल्या सैमीक सुंदरतायेक संद दिवपाचो आपूण यत्न करतलों, अशें राज्यपाल आर्लेकार हांणी सांगलें.
पावसाळ्यांत सत्तरी म्हालांतल्या सैमाक अप्रूप गिरेस्तकाय लाबल्या. ह्या सैमाचो संवसारीक पांवड्याचेर प्रचार जावचो हे खातीर पांयभोंवडी आयोजीत केल्ले खातीर राज्यपाल आर्लेकार हांणी संस्थे वतीन आयोजकांक परबीं दिलीं.
कुंकळकार हांणी सांगलें, अंदूंचे पांय भोंवडेंत देशभरांतल्या 600 लोकांनी वांटो घेतला. शिंयाच्या दिसांनी अशेच तरेची पांय भोंवडी भगवान महावीर अभयारण्यांत आयोजीत करतले. तातूंत रानवटी जनावरांचो अणभव घेवपाची संद मेळटली.
ह्या वेळार मनोज जोशी हांणीय विचार मांडले. प्रवीण सबनीस हांणी सुत्रसंचालन केलें आनी उपकार मानले. राष्ट्रगितान कार्यावळीची सांगता जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
