भांगरभूंय | प्रतिनिधी
भांगरभूंय । प्रतिनिधी
शिवोलीः शिवोले हांगचो सेवाभावी डॉ दत्ता नायक (97) हांका आयतारा सकाळीं मरण आयलें. आठ दिसां पयलीं तांच्या भावाक मरण आयिल्लें. शिवोले वाठारांत दत्ता नायक हांच्या मरणाक लागून लोक दुख्ख उक्तायतात.
पिरायेच्या 95 वर्सां मेरन डॉ नायत प्रॅक्टिस करताले. साठ वर्सां परस चड तेप तांणी ती केली. कोवीड म्हामारी वेळार दुयेंतीक तपासप तांणी बंद केल्लें. जाण्टेपणान जमता तशें तें दुयेंतींक तपासताले. रातीं उसरां लेगीत तपासणे खातीर वच्चें पडलें तरी तें बेजारनाशिल्ले.
डॉ नायक हे मुळचे साश्ट तालुक्यांतल्या बाणावलेचे. तांचें कुटूंब शिवोले कशें पावले हाची तांकां खबर ना. बापूय दोतोर आशिल्ल्यान ते दोतोरके कडेन पावले. पोर्तुगीज तेंपार शिक्षण घेवपाक तांका बरीच तकालस जाली. मात दोतोर जावपाचें ध्येय तांणी पुराय केले. कार्डिओलॉजिस्ट डॉ गुरुप्रसाद नायक हो तांचो चलो. गोंयकारांची सेवा करपा खातीर ते अमेरिकेंतल्यान गोंयांत आयले.
फॅमिली डॉक्टर असो डॉ दत्ता नायक हांचो लौकिक आशिल्लो. 1960च्या दशकांत तांणी वैजकी सेवेक सुरवात केली. 50 रुपयां परस चड फी ते घेनाशिल्ले. दुयेतीची सेवा हीच देव सेवा अशें ते मानताले. तांच्या मरणाचे पुराय गोंयांत दुख्ख उक्तायलें वता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
