भांगरभूंय | प्रतिनिधी
सेझा फुटबॉल अकादमीन 18वी गोंय पुलीस करंड फुटबॉल सर्त जिखली. फायनलींत ताणें शापोरा युवक संघाक 2-1 अशा गोल फरकांनी हारयलो. गोंय पुलीस खेळां विभागान म्हापशेंच्या धुळेर मैदानाचेर सर्तीचें आयोजन केल्लें.
शापोरा युवक संघ मध्यांतरा मेरेन आघाडेर आशिल्लो. पूण, दुसऱ्या अर्दांत सेझा फुटबॉल अकादमीन मॅच घुंवडायली. मध्यांतराक कांय कांय मिनटां बाकी आसतना सच्चिदानंद साटेलकारान शापोराचें खातें उगडलें.
एका गोलान फाटीं आशिल्ल्या सेझान दुसऱ्या अर्दांत बरोबरी करपाचो खर यत्न केलो. पूण, ताका म्हणपा सारकें येस मेळूंक ना. गोल करपाचे ताचे साबार यत्न फुकट वताले. अखेरेक 70व्या मिनटाक ओमकार शेटगांवकारान बरोबरीचो गोल केलो.
बरोबरी सादल्या उपरांत सेझाचो आत्मविस्वास अचकीत वाडलो. ताणें सेगीत प्रतिस्पर्धी पंगडाच्या गोलपोस्टाचेर हल्ले चालू केले. ताचो फायदो ताका सात मिनटां उपरांत फावो जालो. फहिझान गोल करून सेझाक वस्तादपण मेळोवन दिलें.
हेर वैयक्तीक इनामांः सच्चिदानंद साटेलकार (सर्तींतलो उत्कृश्ट स्ट्रायकर), रोनल गांवकार (सर्तींतलो उत्कृश्ट गोलकीपर), रोहित तोताड (सर्तींतलो उत्कृश्ट मिडफिल्डर), हर्षद गांवकार (सर्तींतलो उत्कृश्ट डिफॅण्डर), फहिझ मोहम्मद (उत्कृश्ट खेळगडो), डॉमिनीक सुआरीस (फायनलींतलो उत्कृश्ट खेळगडो)
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
