भांगरभूंय | प्रतिनिधी
संघटणेचे वर्सुकी साबार बसकेंत गाजलो मुद्दो
मुख्यमंत्री आनी हेर आमदारांनी सहकार्य करपाची मागणी
वाळपय: सेझा गोवा खण कंपनीच्या वट्ट 443 कामगारांक 5 ऑक्टोबरा सावन कामा वयल्यान काडटले. हाका लागून कामगारां मदीं खवदळ पडला. मुख्यमंत्री डॉ. प्रमोद सावंत हांणी खण वेवसाय तीन म्हयन्यां भितर सुरू जातलो अशी घोशणा केल्या. हाका लागून कंपनीन ह्या कामगारांक कामा वयल्यान काडचे न्हय. मुख्यमंत्री डॉ. प्रमोद सावंत आनी हेर आमदारांनी लक्ष घालून कामगारांक सहकार्य करचें अशी मागणी सेझा गोवा कामगार संघटणेच्या वर्सुकी साबार बसकेंतल्यान केली.
संघटणेची वर्सुकी साबार बसका सांखळेच्या रवींद्र भवनांत जाली. सभेक व्हड प्रमाणांत कामगारांची हाजेरी आशिल्ली. हे बसकेंत 5 ऑक्टोबरा सावन कामगारांक काडपाचो मुद्दो मुखेलपणान गाजलो. सरकारान कंपनीचे चेपण हाडचें आनी ह्या कामगार कुटुंबाक सुरक्षा दिवची अशी मागणी केली. ह्या वेळार माचयेर सेझा गोवा कामगार संघटणेचे अध्यक्ष देवानंद परब, सचीव रमेश सिनारी, कामगार संघटणेचे पदाधिकारी अनंत गांवस, अमेय नायक, विशाल नायक, सत्यजीत चौरसकार, लॉरेन्स ब्रागांझा, प्रसाद गांवस, प्रेमानंद सावंत हाजीर आशिल्ले.
संघटणेचे अध्यक्ष देवानंद परब हांणी सांगलें की, 5 ऑक्टोबरा सावन कंपनीच्या 443 कामगारांक काडून उडयतले. हे विशींची नोटीस कंपनीन हाचे पयलींच दिल्या. हाका लागून ह्या कामगारांच्या कुटुंबा मुखार उदरनिर्वाहाचो प्रस्न उप्रासतलो. हे विशीं खूबशे फावटी निवेदनां सादर केल्यांत. मुख्यमंत्री डॉ. प्रमोद सावंत आनी गोंयच्या आमदारांनी ह्या कामगारां विशीं गंभीरतायेन विचार करचो.
खणीचें काम बंद आसून लेगीत कंपनीन आमकां बरे तरे नसहकार्य केलां. फुडारांत खणीचो वेवसाय परतून सुरू जायत आशिल्ल्यान कंपनीन ह्या कुटुंबाच्या कामगार भावांचो विचार करचो अशी मागणी केली. निरज गांवस हांणी कंपनीच्या वेवस्थापना बरोबर चर्चा करून हो प्रस्न सोडोवपा खातीर यत्न करतलों अशें आस्वासन दिलें.
प्रसाद गांवस हांणी सांगलें की, निमाण्या खिणा मेरेन कामगार भावांच्या हक्का खातीर लढो दितले. सगल्या कामगार भावांनी कसलीच भिरांत बाळगुची न्हय अशें स्पश्ट केलें. संघटणेचे पदाधिकारी सुरज गांवस हांणी सभेचें सुत्रसंचालन केलें.
कंत्राटदाराचे सुवातेर आमकां आस्पावन घेवचें
कंपनीन खूबशे कडेन कंत्राटदाराची नेमणूक केल्या. अजून लेगीत कांय कडेन कामगारांची गरज आसा. हाका लागून कंपनीन ह्या कामगारांक थंय आस्पावन घेवचें. पूण खंयचेच परिस्थितींत कामगारांक काडून उडोवचे न्हय अशी विनंती केली. कंपनीचे खूबशा राज्यांनी वेव्हार सुरू आसात. थंय वचपा खातीर लेगीत कामगार आयजूय तयार आसात. पूण कंपनीन हे विशींची वेवस्था करची अशी मागणी रमेश सिनारी हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
