भांगरभूंय | प्रतिनिधी
सध्याचें हें इंटरनेट युग. इंटरनॅट आयज जिणेची एक गरज जाल्या. भुरगीं ते व्हडले मनीस सदांच इंटरनॅटाचो वापर करतात. उणोच तीन वरां तरी. देशांतली अर्दी लोकसंख्या मोबायल फोन आनी इंटरनेट वापरता, अशें म्हणल्यार अतिशोयक्ती थारची ना. इंटरनॅटाचें स्वरुप जशें वाडत गेलें, तशे ऑनलायन गुन्यांव वाडत गेले. ऑनलायन गुन्यांव आडावपा खातीर पुलिसांचो सायबर विभाग आपले परीन यत्न करता तरी ऑनलायन गुन्यांव करपी गुन्यांवकार सामान्य मनशाक अर्थीक नदरेन फटोवपा खातीर नवे नवे मार्ग सोदून काडटात. फकत सामान्य नागरीक न्हय तर अधिकारी, वेवसायीक, दोतोर, वकील, अभियंते, शिक्षक, प्राध्यापक, राजकारणी, खेळगडे अशे नामनेचे नागरिक हे फटवणुकेचे बळी थारल्यात. ह्या सायबर गुन्यांवकारांनी आतां (तशी ती देड वर्सा पयलीं सुरू जाल्ल्याचीं उदाहरणां आसात.) फटवणुकेची एक नवी पद्दत सोदून काडल्या ती म्हणल्यार सेक्सटॉर्शन. वीस वर्सां पिरायेचे तरणाटे चले (कांय वेळार स्वताक फुडारिल्ल्यो समजुपी चलयोय) हे फटवणुकेक बळी पडटात.
एक्सटाॅर्शन म्हणल्यार खंडणी तशेंच लिंगीक खंडणी म्हणल्यार सेक्सटॉर्शन. ऑनलायन लिंगीक छळ हालींच्या काळांत खूबच वाडला. तातूंतल्यान हें उतर निर्माण जालां. हे खातीर फेसबूक, इंस्टाग्राम, व्हॉट्सअॅप अशे सोशल मिडिया खातें वापरतात. तुमकां सोशल मिडिया फेसबूक, इंस्टाग्राम अकाउंटांतल्यान अज्ञात तरणाट्या चलये कडल्यान फ्रेंड रिक्वेस्ट मेळटात वा व्हॉट्सअॅपाचेर अज्ञात नंबराचेर मेसेज मेळटा. फेसबूक, इंस्टाग्रामाचेर त्या मॅसेजी विशीं कसलीच म्हायती घेनासतना वा व्हॉट्सअॅपाचेर ती मॅसेजी आमी स्विकारतात. चली म्हणटकच बरेच चले
भुल्लुसतात.
मॅसेज स्वीकारली काय मागीर त्या अज्ञात नंबराचेर सुरवेक गजाली मारप सुरू जाता. मागीर आपशीच व्हिडियो कॉल, व्हॉट्सअॅप कॉल सुरू जातात. ती चली आपलें आंग दाखोवन अश्लील हावभाव करता. दुसऱ्या मनशाक फटयता. ताका उर्बा दिवन ताचे कडल्यानूय अश्लील कामां करपाक लायता. हुस्को करपाची गजाल म्हळ्यार हे सगळे पडद्याचेर रेकॉर्ड व्हिडियो रुपांत रेकाॅर्ड जाता. ते उपरांत ती चली कांय दिसांच्या अंतरान मेसेज, फोन कॉल करून पयशे मागता. तुमी फारीक करूंक नात जाल्यार तुमचो अश्लील व्हिडियो वा अश्लील चित्रां व्हायरल करून तुमकां बदनाम करपाची धमकी दिता. अशे तरेन लिंगीक खंडणीक सेक्सटॉर्शन अशें म्हण्टात. ही कामां कांय गुन्यांवकार चलया वरवीं करून घेतात.
ह्या प्रकरणांनी मुखेलपणान कॉलेजींतल्या विद्यार्थ्यांक आनी समाजांतल्या नामनेच्या नागरिकांक लक्ष्य करतात. पयशे दिना जाल्यार व्हिडियो व्हायरल करपाची धमकी दितात. हाका लागून बदनामेचे भिरांतेन लोक ह्या सायबर गुन्यांवकारांक जाय ती रक्कम दितात. जायते फावट गरजेची रक्कम भरले उपरांत लेगीत परतून मागणी जाता, देखून फटवल्ले लोक मानसीक ताणांत पडटात, आत्महत्या करपाचो मार्ग लेगीत आपणायतात. सेक्सटाॅर्शन करपी ही टोळी आसता. तातूंत चले, चलयो सगलेच आसतात. दिसांतल्यान 100 लोकांक फोन, मॅसेज केली जाल्यार उणेच 10 बकरे तरी सांपडटात. म्हयन्याक उणेच 200 लोक मेळ्ळ्यार पुरो.
पुण्यां हालींच्या काळांत अश्यो दोन घडणुको घडल्यात. (हेर कडेनूय घडल्यात. फक्त त्यो उक्ताडार येनात. कोणे पुलीस कागाळ केली जाल्यारुच ताची म्हायती मेळटा.) वीस वर्सां पिरायेच्या दोन तरणाट्यांनी सेक्सटॉर्शनाच्या सांपळ्यांत सांपडिल्ल्यान नांव घाणावतलें ह्या भंयान आत्महत्या केल्यात. तांच्या आत्महत्यांक लागून फकत पुण्यांतच न्हय तर देशभर दुख्ख व्यक्त जावपाक लागलां. अर्थांत पुण्यां घडिल्ल्यो ह्यो घडणुको पयल्यो न्हय. आदीं जायत्या तरणाट्यांनी सेक्सटॉर्शनांत सांपडिल्ल्यान आपलें जिवीत सोंपयलां.
सायबर गुन्यांवकारांनी पयशे जोडपाची एक नवी पद्दत म्हळ्यार ही सेक्सटॉर्शन. ह्या सायबर गुन्यांवकारांचो सोद घेवप हें
पुलिसां मुकार एक व्हड आव्हान जालां. कारण ते गुन्यांवकार
राज्या भायल्यान वा देशा भायल्यान लेगीत हे प्रकार करता
आसतले.
ह्या सायबर गुन्यांवकारांच्या जाळांत पडचें न्हय म्हणून सोशल मिडिया वापरतना जतनाय घेवची पडटली. सोशल मिडियाचेर खंयचीय अज्ञात फ्रेंड रिक्वेस्ट स्वीकारची न्हय वा अज्ञात क्रमांका वयल्यान येवपी संदेशांक जाप दिवची न्हय. तुमची इश्टांची वळेरी वा फॉलोअर्स वाडोवपाचो अट्टहास तुमकां अर्थीक आनी मानसीक लुकसाण करूंक शकता. तेन्ना सादूर रावचें.
आयचे तरणाटे सोशल मिडियाचे व्हडले फॅन जाल्यात. इंटरनॅट, मोबायल ही तरणाट्यांची एक म्हत्वाची गरज जाल्या, पूण समाजीक हिताच्या गजालीं खातीर ताचो वापर जाल्यार बरें, नातर तुमची एक चूक तुमचो जीव घेवपाक शकता. म्हणून सगळ्यांनी सोशल मिडियाचो वापर जतनायेन करचो. मोह आनी तातूंतल्यान निर्माण जावपी लिंगीक भूक हाका लागून मनीस बदनाम जाता. मरता पसून, हें ह्या सायबर गुन्यांवकारांनी दाखोवन दिलां. तेन्ना दरेकल्यान स्वताच स्वताची राखण करप गरजेची. सरकारान हाचेर तज्ञां वरवीं संशोधन करून सुरक्षा यंत्रणा उबी करपाक जाय, हेंय तितलेंच खरें.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
