भांगरभूंय | प्रतिनिधी
माजोड्डेंच्या सेंट रॉक्स यूथ स्पोर्ट्स क्लबान धर्मापूर स्पोर्ट्स क्लबान आयोजीत केल्ली 43वी सेंट जोसेफ महोत्सव फुटबॉल सर्तीचें वस्तादपण जोडलें. धर्मापूर मैदानाच्या खेळां आनी युवा वेव्हार संचालनालयाच्या मैदानाचेर जाल्ले फायनलींत ताणें फातोड्डेंच्या डॉन बॉस्को ऑरेटरीक 5-3 अशा गोल फरकांनी हारोवन किताब जिखलो.
सेंट रॉक्स यूथ स्पोर्ट्स क्लबान पयल्या अर्दांत 2-0 अशी आघाडी घेतिल्ली. जैतिवंत क्लबा वतीन बेवन डिमेलोन दोन जाल्यार कॅवीन आल्मेदा, जॉस्ली डायस आनी लेनी वाझ हांणी दरेकी एक गोल केलो. उपवस्ताद डॉन बॉस्को ऑरेटरी वतीन मॅक्सवेल फुर्तादो आनी हॅसलम फुर्तादो हांणी गोल केले.
ह्या जैतान सेंट रॉक्साक करंड आनी 50 हजाराचें इनाम फावो जालें, जाल्यार डॉन बॉस्को ऑरेटरीक 40 हजार आनी करंड भेटयलो.
वैयक्तीक इनामांः मॅक्सवेल फुर्तादो (उत्कृश्ट फॉरवर्ड खेळगडो, डॉन बॉस्को ऑरेटरी), क्लिफ बार्रेटो (उत्कृश्ट मिडफिल्डर, डॉन बॉस्को ऑरेटरी), लिस्टर वाझ (उत्कृश्ट डिफॅण्डर, सेंट रॉक्स यूथ स्पोर्ट्स क्लब), कॅवीन आल्मेदा (फायनलींतलो पयलो गोल, सेंट रॉक्स), शेनॉय डीकॉस्ता (उत्कृश्ट गोलकीपर, सेंट रॉक्स), कुंकळ्ळी युनियन (शिस्तीचो पंगड).
इनामां भेटवण सुवाळ्याक धर्मापूरच्या सेंट जोसेफ चर्चीचे फादर आग्नेल पिन्हेरो मुखेल सोयरे म्हूण उपस्थीत आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
