भांगरभूंय | प्रतिनिधी
ग्लेमॉर्गनाचो बॅट्समन सॅम नॉर्थइस्टान लिसेस्टरशायरा आड नाबाद 410 धांवड्यांची खेळी केली. कावंटी क्रिकेटींत 400चो आंकडो हुपपी तो फक्त चवथो बॅट्समन थारलो. ताचे पयलीं ब्रायन लारा, एसी मॅक्लारेन आनी ग्रीम हीक हांणी 400 परस चड धांवड्यो करपाचो पराक्रम केला.
पयले श्रेणीचे क्रिकेटींत 18 वर्सांनी 400चो आंकडो हुपप शक्य जाला. नॉर्थइस्ट हाचे पयलीं 2004त ब्रायन लारान इंग्लंडा आड 400 धांवड्यांची खेळी केल्ली. नॉर्थइस्टान 447 बॉलांनी 400 धांवड्यो पुर्ण केल्यो. जाल्यार 450 धांवड्यांनी 410 धांवड्यांची नाबाद खेळी केली. हातूंत 45 चवक्यांचो आनी तीन सक्यांचो आस्पाव आसा.
ग्लेमॉर्गनान आपलो पयलो डाव 5 बाद 795चेर घोशीत केलो. नॉर्थइस्टान क्रिस कुका (नाबाद 191) वांगडा मेळून नाबाद 461 धांवड्यांची भागिदारी केली.
2007त पयले श्रेणीचे क्रिकेटींत पदार्पण करपी 31 वर्सां पिरायेचो नॉर्थइस्ट आतां मेरेन 192 मॅची खेळ्ळा. हातूंत 11,966 धांवड्यांचो आस्पाव आसा. ताणें 27 शेंकडे आनी 61 अर्द शेंकडे मारल्यात. हाचे पयलींचो ताचो सर्वोत्कृश्ठ स्कोर 191 धांवड्यांचो आशिल्लो.
पयले श्रेणीचे क्रिकेटींत आतां मेरेन फक्त 11 खेपे 400 परस चड धांवड्यो जाल्यात. ऑस्ट्रेलियेचो विल पोंस्फोर्ड आनी वॅस्ट इंडिजाचो ब्रायन लारा हाणें दोन खेपे 400 परस चड धांवड्यो केल्यात. भारता वतीन फक्त एकूच 400 धांवड्यांची खेळी जाल्या.
1948त महाराष्ट्राच्या भाऊसाहेब निंबालकरी हाणें काठियावाडा आड रणजी करंड सर्तींत नाबाद 443 धांवड्यो केल्ल्यो. सगल्यांत चड धांवड्यो करपाचो संवसारीक विक्रम ब्रायन लाराच्या नांवार आसा. ताणें 1994त वॉर्विकशायरा वतीन खेळटना डरहमाा आड 501 धांवड्यांची खेळी केल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
