भांगरभूंय | प्रतिनिधी
अाठ आमदारांचें पक्षांतर जालें ताचे कांय दीस पयलीं जमनी हातासपाचें प्रकरण खूब गाजतालें. कांय ‘बुराटे’, ‘करबटां’ क अटकूय जाल्ली. मात विस्वणांक कोण हात लावपाक शकले नात. एका आमदाराचेंय हे भानगडींत नांव गाजतालें. तातूंत त्या बाबड्याचो कांयच हात नासतलो. नाजाल्यार हो सगलोच भूंयखंड घोटाळो जमनींत मुंगरचो नासलो!!! तो परतून केन्ना वयर सरता, काय आनीक खोल वता, ताची वाट पळोवप इतलेंच लोकांच्या हातांत आसा. चवकशी आयोग नेमला. तो काम सुरू करपाचो आसा.
तीन दिसां पयलीं अडवलपाल (दिवचल) कोमुनिदादीच्या 10 वागड्यांनी 65 हजार चौ. मिटर जमीन स्वताच्याच नांवाचेर केल्ल्या, असो आरोप जाला. 38 गांवकारांनीच हे विशीं विशेश चवकशी पंगडा कडेन (एसआयटी) कागाळ केल्या. तांच्या दाव्या प्रमाण, जमनीच्या एक चौदा उताऱ्याचेर ह्या 10 जाळवणदारांचीं नांवां आयल्यांत. कांय दिसां पयलीं जाल्ले बसकेंत ह्या प्रकरणाच्या मुखेल सुत्रधारान आपलो गुन्यांव सगल्यां मुखार कबुल केला. ताचे पुरावे आमचे कडेन आसात, अशें गांवकार सांगतात. मात एसआयटीन अजून एकल्याय आड कागाळ करूंक ना. हे सगले राजकी मळा कडेन संबंदीत आसात. म्हणटकच एसआयटी पूर्ण चवकशी करूनच मागीर गुन्यांव दाखल करतली. कारण हाचे आदीं सेरुला कोमुनिदादीचें प्रकरण गाजिल्लें, पूण मुखार कांय जावंक ना. घडये तातूंत घुस्पल्ले सगले स्वच्छ गोंयकार, नितळ गोंयकार आशिल्ल्याचें चवकशी यंत्रणांक दिसलां आसतलें.
आयज जो तो राजकारणांत घुसपाचो यत्न करता. तिकेट मेळ्ळी ना तरी निदान मुखेल वावुरपी जावंक सोदता. आंदोलनांनी सगल्यांच्या मुखार रावता. तत्वां, समाज, देशाचे सेवे खातीर हे ल्हान, व्हड फुडारी राजकी मळाचेर आयल्यात, अशें कोणा भावार्थी मतदाराक दिसता आसत जाल्यार ताणें बेगोबेग हाॅस्पिटलांत वचून मानसोपचार सुरू करचे.
राजकारणांत येशस्वी जावंक थारावीक मतां सांबाळ्ळ्यार पुरो. देखूनच कांय फुडारी मतदारांक पांच वर्सां मांडयेर खेळयत आसतात. नोकरी, काॅण्ट्रॅक्ट सोडाच, तांचें घरूय चलोवपी कांय फुडारी आसात. जमनी हातासून तांकां वसोवपीय आसात. प्रत्क्षांत हें काम तांचे मुखेल वावुरपी करतात. हातूंत पालिका, पंचायत आनी कोमुनिदादीचे कांय वांगडी, जाळवणदार आशिल्ल्याचें उक्तेपणी दिसून आयलां. भायल्यांक जमनी विकप, भाड्यान दुकानां भाड्यान दिवप, तांचीं सगलीं सरकारी कामां जाग्यार घालप आनी वयल्यान भायले घुसल्यात, ते हें करता, तें करता अशी हुयेली मारप. भायल्यांक रेशनकार्ड, उदक, लायटीचें कनेक्शन दिवपी हे फुडाऱ्यांचे दावे, उजवे हातूच मागीर भायल्यांच्या आड आंदोलन करतात. सत्तेर आशिल्ल्यांक वायट उतरां दितात. भितरसून सगले एक. फक्त लोकांची दिशाभूल करपाची. हातूंत सद्दां मंत्र्याच्या दारांत वचून उबे रावपी सुवार्थी, बेरकी, लाचार लोक सादोवन घेतात.
अडवलपाल कोमुनिदादींत जें कितें जालां, ती नविदाद न्हय. भोवते कडेन हें चलता. गांवकारांक सगलें खबर आसता. पूण रेब्याच्या कोंडांत फातर मारून हळशीक आंगार कित्याक उडोवन घेवची, असो विचार करून ते ओगी रावतात. अडवलपालकारांनी धाडस कशें केलें तें कळना. राज्यांतल्या सरकारी, कोमुनिदादींच्या जमनीं बाबतींत गैरकारभार जाला काय ना, तें तपास यंत्रणा आनी न्याय यंत्रणा सांगतली. कांय कडेन कायदेशीर मार्गानूय जमनी लाटल्यात. म्हणचे कागदाचेर 1 रुपयाक जमीन विकिल्ल्याचें दाखोवप, पूण प्रत्यक्षांत ती तीन रुपयान विकप. वयले दोन रुपया बोल्सांत. कायद्याच्यो पळवाटो आसात, त्यो सगल्यो शिकून घेतिल्ले राजकी फुडारी हातूंतल्यान सहिसलामत सुटल्यात. अडवलपालींतल्या त्या 38 जाणांचेर आतां मेरेन घडये चेपण आयलां आसतलें. पूण तांणी माघार घेनासतना गोंय, गोंयकारपणा खातीर खिंड लढोवपाक जाय. कारण एसआयटीन सक्रीय जावन नेटान तपास सुरू केलो जाल्यार हेर कोमुनिदादींच्या कारभाराचेर उजवाड पडटलो. थंय जर अशेच गैरप्रकार जाल्यात तर ते उक्ताडार येतले. विदेशांत स्थायीक जाल्ल्या गोंयकारांच्यो जमनी बोगस कागदपत्रां करून हडप करपाचीं प्रकरणां घडल्यांत. कांय जाणांक अटक जाल्या. मात सध्या सगल्यांक जामीन मेळ्ळा. जांच्यो जमीन गेल्यात, तांकां न्यायालयांत फावटी मारच्यो पडच्यो न्हय, म्हूण सरकारान चवकशी आयोग नेमला. तांणी, एसआयटीन हें अडवलपालाचें प्रकरण बेगीन हातांत घेवचें. बाकीच्या कोमुनिदादींचीय कागदां तपासचीं…. आनी कोण दोशी आसत जाल्यार तांचेर कारवाय करची. अडवलपालीच्या आनी हेर कडल्या गांवकारांचीय हीच मागणी आसतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
