भांगरभूंय | प्रतिनिधी
पर्यटकां खातीर खासा अॅप, दक्षीण गोंयांत दायज महोत्सव
भांगरभूंय I प्रतिनिधी
पणजी : सुरक्षा, नितळसाण, टेळणी, कोयर वेवस्थापन आनी रोशणाये खातीर एकवटीत दर्यादेग वेवस्थापन धोरण तयार जातलें. दर्यादेग वाठारांतल्या आमदारांक विस्वासांत घेवन हें धोरण तयार जातलें, अशें पर्यटन मंत्री रोहन खंवटे हांणी सांगलें.
पर्यटकां खातीर खासा अॅप तयार करतले. सरकारी छापखान्याचे पणजी सावन स्वतंत्र सुवातेंत स्थलांतरण करतले. नव्या सुवातेचो सोद सुरू आसा. पर्यटन, म्हायती तंत्रज्ञान खात्याच्या मागण्यांचेर उलयतना मंत्री रोहन खंवटे हांणी ही म्हायती दिली.
सरकारी छापखान्या मदीं नवें तंत्रज्ञान येवपाची गरज आसा. सरकारान ‘स्टार्ट अप’ तशेंच म्हायती तंत्रज्ञान धोरण तयार केलां. ह्या धोरणा खाला 146 स्टार्ट अपांक 2 कोटी 77 लाख रुपयांचें अनुदान दिलां. आतां 43 लाख रुपयांचें अनुदान दिवपाचें आसा.
तुयां इलेक्ट्रॉनीक सीटींत अंदूं कंपनीं सुरू जातल्यो. सरकारा कडेन आयटी खातीर दोना पावला, पर्वरी आनी चिंबला जमीन उपलब्ध आसा. सचीन लवंदे, आनंद प्रभुदेसाय हांचे सारके गोंयचे तरणाटे आयटी उद्देग स्थापन करपाक इत्सूक आसात, अशें मंत्री खंवटे हांणी सांगलें.
उदका खेळां धोरणांत बदल करपाचो प्रस्ताव आसा. गोंय सध्या युके आनी रशियेंतल्या पर्यटकांचेर निंबून आसा. युके आनी रशिये सयत हेर देशांतले पर्यटक व्हड प्रमाणांत येवपाची गरज आसा.
दर्यादेगांचेर बेकायदाे गजालींनी वाड जाल्या. योग्य कायदे तयार करपा खातीर सरकार नाल्सा हे एजन्सीची मजत घेतलें. दर्यादेगांची धूप मोट्या प्रमाणांत जावपाक लागल्या. रेंव व्हांवन वचप ही व्हड धोक्याची गजाल आसा. हाका लागून वेवसायीक शॅक घालपाक पळयनात. बायणा, कोलवें, बाणावली आनी कळंगूटे आदर्श शॅक उबे जातले.
पर्यटकां खातीर खासा अॅप तयार करतले. गोंया विशींचो अणभव अॅप माध्यमांतल्यान उक्तावपाची संद पर्यटकांक मेळटली. दक्षीण गोंयांत दायज महोत्सव आयोजीत करपाचो प्रस्ताव आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.