भांगरभूंय | प्रतिनिधी
आगुस्तिनो मिस्किताः गोरवांचे आयातीचेर बंदी
भांगरभूंय । प्रतिनिधी
पणजीः देशभरांत पातळिल्ल्या लंपी विशाणून गोंयांतूय प्रवेश केला. गोंयांतल्या आठ गायींक ह्या विशाणूंचो संसर्ग जाला. मात राज्यांत म्हयन्याभरा आदींच्यानूच ह्या विशाणू विरोधांतली ‘गोट पॉक्स’ वासिनां दिवपाक सुरवात केल्या. राज्यांतल्या सुमार 13 हजार गायींक हें वासीन दिलां, अशी म्हायती गोरवा सांबाळ खात्याचे संचालक आगुस्तिनो मिस्किता हांणी दिल्या.
सध्या वासिनां सोंपल्यांत. पुण्याच्यान वासिनां धाडल्यांत, तीं शुक्रार मेरेन पावतलीं. शेजारच्या कांय राज्यांनी ह्या विशाणूंचो संसर्ग वाडत आसा. ताका लागून थंयच्यान गायी, म्हशी हाडपाक बंदी घातल्या, अशें मिस्किता हांणी सांगलें.
मजगतीं, हो विशाणू राजस्थान, गुजरात, पंजाब, हरियाणा, उत्तरप्रदेश, उत्तराखंड, मध्यप्रदेश, जम्मू आनी काश्मीर, आंध्रप्रदेश तशेंच अंदमान आनी निकोबार ह्या वाठारांनी व्हड प्रमाणांत दिसून आयला. राजस्थानांत दिसपट्टें 600 ते 700 गायींक मरण येता. हेर राज्यांत हे प्रमाण 100 आसा. आयज मेरेन 65 हजारां परस अदीक गायींक मरण आयलां.
लंपी प्रोवॅकइंड चार म्हयन्यांत बाजारांतः स्वीन
देशांत 20 कोटी गोरवां आसात. तातूंतल्या देड कोटीं परस अदीक गायींक वासीन दिलां. गोट पॉक्स वासिनाचे दर म्हयन्याक 4 कोटी डोस तयार करतात. लंपी प्रोवॅकइंड हें ह्या विशाणू विरोधांतलें वासीन तीन चार म्हयन्यांत बाजारांत येतलें, अशी म्हायती गोरवां सांबाळ आनी दूद वेवसाय विभागाचे राष्ट्रीय सचीव जतींद्रनात स्विन हांणी दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
