भांगरभूंय | प्रतिनिधी
कला राखण मांडान भर पावसांत काल सुपारी आंदोलन सुरू केलें. कला अकादमींत कार्यावळ पळोवंक आयिल्ल्यांक तांणी सुपारी दिवन कला अकादमी परतून आशिल्ली तशीच करपाक वा ज्यो समस्या कलाकारांक त्रास करतात त्यो सुटाव्यो करपाक तांचो तेंको मागलो.
नुतनीकरणा उपरांत, 2023 वर्साचे अखेरेक कला अकादमी परतून एक फावटी कलाकारां खातीर आनी रसीकवर्गा खातीर उक्ती केल्ली. त्या दिसा सावन कांय कलाकारांनी कला अकादमींत ज्यो त्रुटी उरल्यात ताचेर आवाज काडपाक सुरवात केल्ली. मात संबंदीत सरकाराच्या खात्यांनी वेंचीक कलाकारांचीं गाराणीं आयकलीं नात वा घडये कानार केंस ओडले. ताचो परिणाम म्हूण आयज हेच वेंचीक कलाकार, जांकां कला अकादमी विशीं प्रेम आसा आनी कलेची तळमळ आसा, ते मुखार सरल्यात आनी सुपारी आंदोलना वरवीं सरकारी यंत्रणेचें लक्ष ओडपाचो यत्न करतात. तांकां येस मेळूं आनी आमची कला अकादमी आदली सारकी जावं. तशेंच कोसळून पडिल्लो ‘ओपन ऑडिटोरिम’ परत उबारपाक सरकाराक बळगें दिवं.
हांव कलाकार न्हय. पूण सांस्कृतीक कार्यावळी, नाटकां कला अकादमींत पळयल्यांत. ते खातीर घडये म्हजें नातेंय कला अकादमी वांगडा आसा. मात कालचें सुपारी आंदोलन पळयतकच एक दुख्ख जालें ते म्हणल्यार कलाकार जाय तितले संख्येन थंय हजर नाशिल्ले. पूण एक खोस म्हणल्यार जांकां जांकां कला अकादमी सारकी जाल्ली जाय, तांणी सुपारी आंदोलनाच्या कलाकारां कडल्यान ‘सुपारी घेतली’ आनी आपलो तेंको दिलो.
सरकार नवें घडलें वा नवो कला आनी संस्कृती मंत्री जाता तेन्ना परबीं भेटोवपाक ‘थोडे कलाकार’ एकामेका कडेन ताचो मोबायल नंबर घेतात आनी परबीं भेटयतात. हेच उमेळशिकेन ‘त्या कलाकारां’नी कागाळीय केल्ल्यो जाल्यार आयज घडये चित्र वेगळें आसपाचें. अशा प्रस्नाचेर गटबाजी वा लिपून रावप उपकारना. आनीक कला अकादमीचो हो विशय सादो न्हय. खंयच्याय स्वाभिमानी, नितीमत्ता आशिल्ल्या कलाकाराक कला अकादमीचेर घाव जाल्लो पळयतना काळजांत चर्र जावंक जाय. जालें ना जाल्यार घावो घालतल्याक ते समर्थन करतात असो ताचो अर्थ जातलो.
कला अकादमीचें काम निविदा काडिनासतना ‘आपल्याक जाय’ ताका दिलें म्हूण विरोधकांनी बोवाळ घालो आनी ह्या कामांत कोट्यांनी रुपयांचो भ्रश्टाचार जालो असोय आरोप जालो. अशें जातकच ‘शाहजहानान’ ताजमहल बांदतना निविदा मागोवंक नाशिल्ल्यो, तरीय ताजमहाल आसा तस्सो आसा अशें म्हणून सरकारान समर्थन केलें. पूण ताजमहाल सारकी घटसाण कला अकादमीच्या नुतनीकरणाच्या कामांत आसा? गोंया भायले नामनेचे कलाकार जेन्ना कला अकादमीच्या त्रुटी विशीं उलयतात तेन्ना ‘ताजमहला’च्या कामा वांगडा कला अकादमीची तुळा करप समा जातलें? आनीक आमचीं सांस्कृतीक केंद्रां जर अशीं दुबळीं जालीं जाल्यार कलाकारांक उर्बा कशी मेळटली?
पयर पडिल्ल्या पावसांत काणकोणच्या रवींद्र भवनांत उदकूच उदक जालें. सिलिंग फॅनांतल्या पायपा वयल्यान उदक भितर गळटा ते व्हिडियो व्हायरल जाले. आतां ह्या भवनाचेंय काम उणाक दर्जाचें जालां आसुये असो बोवाळ सोशल मिडियाचेर चलतालो. इतलेंच न्हय तर ‘गोंयचो नवो ताजमहाल’ असो थोमणोय लोकांनी सरकाराक मारला. हे खातीर सरकारान हाचेर गंभीरतायेन चितप गरजेचें आनी ‘इगो’ बी (आसा जाल्यार) कुशीक दवरून अशा इमारतींक बसयिल्लो दरेक चिरो घटमूट आसा न्हय? ताका भ्रश्टाचाराचो हात लागूंक ना न्हय? हाची खात्री करून घेवप गरजेचें. हें तपासून पळयलें ना जाल्यार ‘भ्रश्ट पोकळ चिरे’ पडपाक वेळ लागचो ना. ते पडटना कोणाक सांगून पडचें ना इतलें मतींत दवरप गरजेचें.
गोंयांत कितलेशेच कलाकार आसात. घडये तांचेंय मदीं फूट आसा, आनी ते खातीर कला अकादमीच्या त्रुटी विशीं आवाज काडप्यां आड आवाज काडपीय कलाकार आसात. हो दुसरो गट घडये नवो मंत्री जातकच ताका ‘परबीं’ भेटोवपाक मोबायल मागप्यां मदले आसूं येतात. मंत्र्याक वा सरकाराक लागीं रावलो ना जाल्यार कार्यावळी मेळच्यो नात हाचो भंय सतायता तो आवाज काडचो ना. तो ओग्गी रावतलो. हे खातीर ‘सुपारी आंदोलन’ करप्यांक खरी परबीं फावता. शाहजहानान कामगारांचीं बोटां कांपिल्लीं अशें म्हणटात, आवाज काडटकच बोल्सां कापपाचो भंय कुशीक राविल्ल्यांक दिसूंक ना न्हय?
कला अकादमीचो विशय फाटलीं तीन- चार वर्सां गाजता. नुतनीकरण जावन रोखडेंच ‘फॉल्स सिलिंग’ पडटा, एसीचें उदक गळटा, ओपन ओडिटोरीम पडटा हीं चिन्नां बऱ्याचीं न्हय. ज्या कंत्राटदारान हें काम केलां, ताका जबाबदार धरून त्रुटी/समस्या पयस करप गरजेचें आशिल्लें. कंत्राटदाराक काळे वळेरेंत घालून ताका मेकळो सोडलो जाल्यार ताचें आयतेंच फावतलें. जें जें काम सारकें जावंक ना, तें तो करता काय ना हें पळोवपाक समिती काडप गरजेची आसा. हे समितीन ताचेर नदर दवरून तें काम करप गरजेचें आसा. ह्यो सगल्यो गजाली सरकारी अधिकाऱ्यांचेर सोंपयल्यो जाल्यार सगलें जाग्यार पडटलें अशें दिसता? अशें आशिल्लें जाल्यार ज्या भौशीक बांदकाम खात्यान कला अकादमीचें काम करून घेतलां, ताचेर लोक राग उक्तावपाचे नाशिल्ले. आनीक जर कला अकादमीच्या चिऱ्यांक वाचा फुटली जाल्यार कोणाचीच धडगत ना. कोणकोणाच्यो भानगडी उक्तडार येत हें सांगूंक शकना. कित्याक तर कला अकादमी खातीर स्थापन केल्ल्या कृती समितीन सुमार विशेक त्रुटी दाखयल्यात. पारदर्शक रितीन काम जालां जाल्यार इतले कोटी मोडून इतल्यो त्रुटी उरपाक शकतात?
कला अकादमीचेर एक संकश्ट आयलां तें आयलां, आतां काणकोणच्या रवींद्र भवनाचेर सरकारान सारकी नदर मारपाची गरज आसा. ह्या भवनाचें उक्तावण 10 म्हयन्यां फाटीं जालां आनी आतां पयल्याच पावसान तें गळपाक लागलां. ह्या भवनाचें काम तरी सारकें केलां? काय ताच्या चिऱ्यांचेर लेगीत ‘हात मारला’?
संजय बोरकार
9921343430
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
