भांगरभूंय | प्रतिनिधी
खलिस्तानवादी आतंकवाद्यांक हें आवडलें ना. तांणी जालंधरांत तांचेर हललो केलो. रिबेरो तातूंतल्यान वाटावले. निवृत्त जाले उपरांत ते रुमानियाचे राजदूत म्हूण थंय गेले. थंयूय खलिस्तान आतंकवाद्यांनी तांचेर हल्लो केलो.
गोंयचे सुपूत ज्युलियो रिबेरो (पिराय 94 वर्सां). जांकां सुपर काॅप म्हूण वळखतात. तांणी पंजाबांत एका काळार आतंकवाद्यांचीं धुमशेणां उणीं करपाक सरकाराक मजत केली. हालींच ते गोंयांत तांचें नवें पुस्तक सेनिटी आॅफ होप प्रकाशीत करपाक आयिल्ले. ही संद घेवन तांचे कडेन भासाभास केली. ती ह्या लेखा वरवीं दितां.
ज्युलियो पोस्टांत लागचे, अशी तांच्या आवय- बापायची इत्सा आशिल्ली. तांणी ते प्रमाण अभ्यासूय सुरू केल्लो. तोय गोंयांत. 1952 वर्सा. पूण अचकीत ज्युलियो हांकां जोर येवपाक लागलो. मागीर परिक्षा खंयची. अभ्यासूच जायना जालो. अश्या वेळार दो. गायतोंडे हांणी जोर कसलो तो वळखलो आनी तांकां इंजेसांव दिलें. चमत्कार म्हणल्यार जोर सामको गेलो. ज्युलियो हांणी नेटान अभ्यास केलो आनी मुंबय येवन परिक्षा दिली. उपरांत पासूय जाले. त्या वेळाच्या नेमा प्रमाण, तांकां पुलिशेंत रुजू जावचें पडलें. युनिफाॅर्माची आवड आशिल्ल्यान तांणी पुलिसूच जावपाचें थारायलें. सुरवातीक तांच्या आवय- बापायक हें आवडूंक ना. मात उपरांत तांणी तें मानून घेतलें.
ज्युलियो ल्हानपणांतली गजाल सांगतात. एकदां ते आनी कांय भुरगे क्रिकेट खेळटाले. चुकून एक बाॅल जनेलाचेर आपटलो आनी हारसो फुटलो. जालें. धनयान पुलिशेंत कागाळ केली. पुलीस अधिकारी आशिल्लो ब्रिटीश. ताणें विचारलें, पंगडाचो कॅप्टन कोण? सगले भियेले. कोणूच जाप दिना जालो. एकल्यान ज्युलियोक कॅप्टन म्हूण मुखार केलो. अधिकाऱ्यान ताका वयर सकयल पळयलो आनी सांगलें, क्रिकेटींत बाॅल अशे वयर मारिनात, हें तांकां शिकोवंक ना जाल्यार शिकय. शाॅट सरळ मारपाचे म्हूण. त्या अधिकाऱ्याची ही जाप आयकून ज्युलियोक पुलिशे विशीं आकर्शण निर्माण जालें. मागीर तांणी पुलिशेची परिक्षा दिली. सुरवेक ते नाशिक, कोल्हापूर, गुजरात अशा जाग्यांचेर पावले. मुंबयचे तर ते कमिशनर जाले. गुजरातांत आसतना दोन म्हयन्यां उपरांत तांकां फोन आयलो, पंजाबाची परिस्थिती बरी ना. तुमकां थंय वच्चें पडटलें. खीणभर कितें जाप दिवची तें ज्युलियो रिबेरो हांकां कळ्ळें ना. पूण राष्ट्रप्रेम पळोवन तांणी पंजाबांत वचपाचें थारायलें. रोखडेच रुजूय जाले. थंयचे परिस्थितीचो अभ्यास करून पावलां उखल्लीं.
खलिस्तानवादी आतंकवाद्यांक हें आवडलें ना. तांणी जालंधरांत तांचेर हललो केलो. रिबेरो तातूंतल्यान वाटावले. निवृत्त जाले उपरांत ते रुमानियाचे राजदूत म्हूण थंय गेले. थंयूय खलिस्तान आतंकवाद्यांनी तांचेर हल्लो केलो. निवृत्त जाले उपरांत ज्युलियो हांणी गरिबांच्यो समस्या पयस करपाक सर्वधर्मीय मुहल्ला समिती आनी एक बिगर सरकारी संस्था सुरू केली.
पुलिशेंत भ्रश्टाचार रुजला हें कळटकच ते महाराष्ट्राचे मुख्यमंत्री पृथ्वीराज चव्हाण हांकां ते मेळ्ळे. तांचे वांगडा निवृत्त सचिव देशमुख आसले. दोगांयनी भ्रश्टाचाराची कागळ पुराव्यां सयत केली. पुलिशेंत भ्रश्टाचार रिगला हें चव्हाण हांणी मान्य केलें. मात तांणी सांगलें, म्हजें युती सरकार. हांव इत्सा आसूनय कांयच करपाक शकना. नेमकें अशेंच कारण गोंयचे मुख्यमंत्री मनोहर पर्रीकार हांणी तांकां दिल्लें. ज्युलियो आनी तांचे एक वांगडी पुलीस नेमांत बदल हाडचे म्हूण पर्रीकार हांकां मेळ्ळे. पूण पर्रीकार हांणी तांकां खाजगींत सांगलें, तुम्ही म्हणटात तें बरोबर, पूण आमदार खर विरोध करतले. शिवाय आमचें सरकार युती सरकार आशिल्ल्यान सध्या तरी हांव हे बदल करपाक शकना. मागीर तो प्रस्ताव तसोच उरलो.
उपरांत ज्युलियो रिबेरो हांणी वाचनाक वेळ दिवचो केलो. तांची बुलेट फॉर बुलेट ही आपजीण बरीच लोकप्रीय जाली. मंजिरी दामले हांणी ताचो मराठींत अणकार केला. तोय गाजला. हें पुस्तक जायत्या जाणांक प्रेरणा दिवपी थारलां. तांचें नवें सेनिटी आॅफ होप हें दिसाळ्यांत प्रसिद्ध जाल्ल्या लेखांचें संकलन. तें इंग्लिशींत आसलें तरी ताचो मराठी अणकार रोखडोच येतलो, अशें तांणी सांगलें.
प्रा रामदास केळकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
