भांगरभूंय | प्रतिनिधी
अमिताभ हो ताच्या काळांतलो सगळ्यांत चड मानधन घेवपी अभिनेतो. आतां मेरेन ताणें 200 परस चड चित्रपटांनी अभिनय केला.
आयज 11 ऑक्टोबर. हिंदी सिनेमाचे शाहेनशाह, व्हड नायक अमिताभ बच्चन हांचो वाडदीस. 1942 त उत्तर प्रदेशांतल्या इलाहाबाद शारांत जल्मल्ल्या अमिताभाच्या बापायचें (हरिवंशराय बच्चन) मूळ आडनांव श्रीवास्तव आशिल्लें. ते बच्चन ह्या टोपण नांवान कविता उजवाडायताले. आपली जात कळची न्हय, म्हूण तांणी तें घेतिल्लें अशें कळटा. बच्चन म्हणचे बच्चा, वचनाक जागपी असोय ताचो अर्थ जाता. अमिताभान चित्रपट मळार प्रवेश करतना बच्चन हें आपलें आडनांव म्हणून वापरपाक सुरवात केली. उपरांत पुराय घराण्याचें बच्चन हें आडनांव वेव्हारांत प्रचलित जालें. अमिताभ बच्चनान शालेय शिक्षण इलाहाबादच्या ज्ञान प्रबोधिनी आनी बॉयज हायस्कुलांत केलें. दिल्लीच्या किरोडिमाल कॉलेजींतल्यान विज्ञानाची पदवी मेळयली. ते उपरांत कांय काळ कोलकाताचे एके कंपनींत काम केलें, पूण ताका तें आवडलें ना, थंयच्यान तो मुंबय आयलो आनी फिल्मांनी कामाची संद सोदपाक लागलो.
ख्वाजा अहमद अब्बास हांच्या ‘सात हिंदुस्तानी’ फिल्मांत अमिताभ बच्चनाक संद मेळ्ळी. हातूंत गोंय मुक्ती लढ्याचे चळवळीचे हो सिनेमा आदारीत आसा. दुर्दैवान तो चल्लो ना. अमिताभाचोय जाय तसो प्रभाव पडलो ना. अमिताभ बच्चनान पदार्पण केलें तेन्ना देव आनंद, शम्मी कपूर, राजेश खन्ना, विनोद खन्ना, जितेंद्र, धर्मेंद्र, शशी कपूर अशें देखणे नायक आघाडेचेर आशिल्ले. अशा वेळार अमिताभ तिगून उरतलो काय? असो सगल्यांकूच प्रस्न पडिल्लो. ताचो पयलो चित्रपट व्हडलो फ्लॉप थारलो. पूण ताणें हार मानली ना. फाटोफाट सात सिनेमा फ्लॉप जाले. ताणें सिनेमा मळ सोडपाचें थारायिल्लें. पूण जांच्या घरांत रावतालो, त्या मेहमूद हांणी ताका थोडे दीस रावपाक सांगलें.
उपरांत प्रकाश मेहरान दिग्दर्शीत केल्ल्या ‘जंजीर’ (1973) सिनेमान अमिताभाक व्हडलो ब्रेक मेळ्ळो. ह्या सिनेमांत पुलीस निरिक्षक म्हणून ताची भुमिका खूब लोकप्रिय जाली. ताची ‘अँग्री यंग मॅन’ ची प्रतिमा लोकांक आवडटली. प्रचलित समाजीक वेवस्थे आड बंड करपी आनी राग उक्तावपी तरणाट्यांची ही भुमिका प्रेक्षकांक आपलीकशी दिसली. उंच शरीर, भेदक दोळे, खणखणीत, वेगळेच तरेचो आवाज आनी अद्वितीय अभिनय शैलीक लागून ताणें प्रेक्षकांक मोनेळ घालो. रोखडोच तो सुपरस्टार जालो. राजेश खन्नाचें यूग ताणें सोंपयलें.
दिग्दर्शक हृषीकेश मुखर्जीच्या ‘आनंद’ सिनेमांत सुपरस्टार राजेश खन्ना वांगडा काम करपाची संद ताका मेळ्ळी. हे संदीचें ताणें भांगर केलें. त्या वर्सा ताका सहाय्यक अभिनेत्याचो फिल्मफेयर पुरस्कार फावो जालो. ‘नमक हराम’ ह्या चित्रपटांतली ताची भुमिकाय नदरेंत भर सारकी आशिल्ली. अमिताभ बच्चनान 1970 आनी 80 च्या दशकांत लोकप्रियतेची तेंगशी गांठली. 1985 उपरांत मात तो सुपर फ्लाॅप थारलो. मागीर वयर सरलो तो कौन बनेगा करोडपती, कार्यावळी वरवीं. दीवार, शोले, अभिमान, कभी कभी, अमर अकबर अँथनी, मुक्कदार का सिकंदर, त्रिशूल, डॉन, काला पथ्थर, नसीब, लावारीस, सिलसिला, नमक हलाल, कुली, शराबी, खुद्दार, अग्नीपथ अशे एकापरस एक सुपरहिट सिनेमा ताणें दिले. अमिताभा इतली लोकप्रियता (राजेश खन्ना सोडून) खंयच्याच अभिनेत्याक आयज मेरेन मेळूंक ना. अमिताभ हो ताच्या काळांतलो सगळ्यांत चड मानधन घेवपी अभिनेतो. आतां मेरेन ताणें 200 परस चड चित्रपटांनी अभिनय केला. कांय चित्रपटांनी ताणें गायनूय केलां. ‘मिस्टर नटवरलाल’ ह्या सिनेमांतल्या प्लेबॅक गायना खातीर ताका फिल्मफेयर पुरस्कार फावो जालो.
1984 वर्सा ताणें राजकारणांत प्रवेश केलो, पूण हो आपलो प्रांत न्हय हें कळटकच राजकारण सोडलें. 1982 वर्सा कूली फिल्माच्या शुटींग वेळार अपघात जालो तरी अमिताभ कोट्यांनी फॅन्सांचो आशीर्वाद घेवन परतून उबो रावलो. 1996 वर्सा ताणें अमिताभ बच्चन कॉर्पोरेशन लिमिटेड ही कंपनी स्थापन केली. पूण रोखडीच बंद करची पडली, कारण ताका व्हड अर्थीक लुकसाण भोगचें पडलें. तें भरून काडपाक ताणें ‘कौन बनेगा करोडपती’ ही टिव्ही मालिका स्विकारली. हो क्विझ शो ताणें यशस्वी केलो. आयज तो 83 वर्सां पुराय करता तरी ताका इतली उमेद आसा की तरणाट्यांक पसून लज दिसतली. अमिताभ बच्चन सारको प्रतिभावान अभिनेतो जिणेंत एकदांच जल्माक येता. ताचे सारको अभिनेतो परत घडचो ना. अमिताभाक वाडदिसाचीं परबीं दितना, ते चड काळ जियेवंचे म्हूण हांव देवा कडेन मागणें करतां. वाडदिसाचीं परबीं!
श्याम ठाणेदार
99225 46295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
