भांगरभूंय | प्रतिनिधी
गोंयांत सुणो चाबपाच्या घडणुकांनी वाड जायत चल्ल्या. रस्ताद तशेंच पोशिल्लीं सुणी केन्ना येवन घांसायत हें सांगूं येना. हालींच ताळगांवां दोगां भुरगीं खेळटना कुशीक आशिल्ले एके बिल्डींगेंतल्यान पोशिल्लो रॉटवेलर हे जातीचो सुणो येवन तांचेर घुरी घातली. त्या दोगांयकूय गंभीर जखमी केलीं. सध्या उत्तर प्रदेशांत रेबीज दुयेंसाक लागून भुरग्याक मरण आयिल्ल्याचें प्रकरण सोशल मिडियाचेर व्हायरल जालां. गाझियाबादांत रावपी शाहवाजाक देड म्हयन्या आदीं शेजार्याच्या सुण्यान चाबलो. हें ताणें आपल्या कुटुंबा कडल्यान लिपोवन दवरलें. उपरांत ताका रेबीज जावन मरण आयलें. ह्या प्रकरणांत गुन्यांवकारांचेर कारवाय करची अशी मागणी आतां जाता. सुणो चावपा पसून कशी जतनाय घेवप हे विशीं जाणून घेयात.
रेबीजचेर वखद मेळना. रेबीज आशिल्लो खंयचोच दुयेंती बरो जायना आनी ताका मरण येवपाची शंबर टक्के आसता, अशें जाणकार सांगतात. देखून सुण्यांचें चाबप आडावपा खातीर तुमी शक्य तें सगळें करचें अशें दोतोर सांगतात. भुरग्यांक सुण्यां पासून राखण दिवपा खातीर पालकांनी खंयची जतनाय घेवची?
१. तुमकां वा तुमच्या कुटुंबा वांगडा सुणो चाबपाची घडणूक घडपाक शकता हें लक्षांत दवरात आनी तुमचे भोंवतणच्या कोणांय वांगडा अशें जाल्यार तुमी सादूर रावचें. अशे घडणुके कडेन आड नदर करिनासतना संबंदीत लोकांक मजत करात.
२. तुमचे सोसायटीचे बसकेंत पाळिल्ल्या सुण्याच्या धनयां मुखार तुमची समस्या मांडात. ताचेर मेकळेपणान चर्चा करात. सोसायटींतल्या दरेका पाळिल्ल्या कुत्र्याचें लस्सीकरण केलां हाची खात्री करून घेयात.
३. ल्हान भुरगीं आनी पोशिल्ल्या सुण्याचीं खेळपाचीं खेळणी वेगळीं करून दवरचीं. भुरग्यांक जर गार्डनांत व्हरता जाल्यार सुण्यां पसून तांची राखण करात.
४. भुरग्यांच्या खेळपाचे सुवातेर पोशिल्ल्या जनावरां विशीं खर नेम तयार करात.
५. तुमच्या भुरग्यांक सुण्यां पसून पयस रावपाक प्रशिक्षीत करात. तांचें कडल्यान आशिल्ल्या धोक्या विशीं तांकां म्हायती दियात.
६. तुमचे कॉलनींत रस्ताद सुणीं आसल्यार सोसायटींतल्या जनावरां प्रेमीं कडेन संपर्क करात आनी ते सुण्यांच्या लसिकरणाची आनी हेर गरजांची जापसालदारकी घेतले हाची खात्री करात.
७.तुमी रावपी वाठारांत जर चाळवल्लें सुणें आसा वा खंयचीय समस्या आशिल्लें सुणें आसत जाल्यार ते विशीं योग्य प्रक्रिया फॉलो करून ऍक्शन घेयात. एनजीओ, सुणें प्रेमींक भियेंवचें न्हय. सदांच तुमच्यो समस्या मांडात. कारण तुमच्या भुरग्यांचे जिणें परस आनीक कांयच म्हत्वाचें ना.
८. तुमच्या यत्नां उपरांतूय सुणो चाबल्यार सदांच दोतोरांचो सल्लो घेयात. जर सुणो फकत चावला वा नाखूट लायलां जाल्यार ताचें लसीकरण जाल्ल्याची खात्री करून घेयात. माजर वा माकड चाबल्यारुच तुमी दुयेंत पडूं येतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
