सुटके झुजारी नागेश करमली हांचे कुडीचेर निमाणे संस्कार

भांगरभूंय | प्रतिनिधी

पणजी : सुटके झुजारी तशेंच साहित्यीक नागेश करमली हांचे कुडीचेर शुक्रारा सकाळीं सांत इनेज मसंडभुयेंत निमाणे संस्कार जाले. समाजीक तशेंच साहित्यीक मळा वेले वावुरपी ह्या वेळार हाजीर आशिल्ले. नागेश करमली हांकां बिरेस्तारा दनपारां मरण आयिल्लें.

मुख्यमंत्री डॉ. प्रमोद सावंत तशेंच विरोधी पक्ष फुडारी युरी आलेमांव हांणी फुलांचो झेलो घालून तांकां आर्गां ओंपलीं. तांच्या मरणा खातीर तरेकवार वाठारांतल्या मानेस्तांनी दुख्ख उक्तायलां.

कोंकणी चळवळ तशेंच गोंयच्या मुक्ती लढ्यांत नागेशबाबाचें व्हड योगदान आशिल्लें. तरणाटे तशेंच कार्यकर्त्यांक ते सेगीत मार्गदर्शन करताले.

खण कंपनींत पर्यवेक्षक म्हूण तांणी काय तेप नोकरी केली. गोंयच्या मुक्ती लढ्यांत तांचो मोटो वांटो आशिल्लो. पणजी आकाशवाणीचेर निवेदक म्हूण तांणी नोकरी केली. जोरगत, सांवार, वंशकुळाचे देणे हे तांचे कवितांझेले लोकप्रीय जाले. वंशकुळाचे देणे हे तांच्या कवितांझेल्याक 1992 वर्सा साहित्य अकादेमीचो पुरस्कार फावो जालो. ते भायर 2007 वर्सा तांकां राज्य पुरस्कार फावो जालो. कोंकणी तशेंच मराठी दिसाळ्यांनी तांणी सातत्यान लेखन केलां.